Tergeý organdarynyń sheshimine prokýrordyń kelisim berýi elektrondyq formatta júrgiziledi – Bas prokýratýra
Sharaǵa Qazaqstan Respýblıkasy Prezıdenti Ákimshiliginiń basshysy Erlan Qoshanov, Prezıdenttiń kómekshisi – Qaýipsizdik Keńesiniń hatshysy Áset Isekeshev, sondaı-aq quqyq qorǵaý organdarynyń basshylary, sondaı-aq quqyq qorǵaý júıesin reformalaý jónindegi jumys tobynyń músheleri qatysty. Pılottyq joba Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» Joldaýynda berilgen tapsyrmalardy oryndaý aıasynda júzege asyrylǵan.
Polıtsııa tergeýshisi men prokýror pılottyq jobanyń tájirıbede qoldanylýyn kórsetti. Joba adam quqyqtary men bostandyqtaryna qatysty sotqa deıingi tergep-tekserý organdarynyń negizgi sheshimderin kelisý boıynsha prokýrordyń ózine júktelgen mindetterin oryndaýdyń elektrondyq formatyn kózdeıdi.
Osyǵan deıin eki óńirde - Pavlodar jáne Shyǵys Qazaqstan oblystarynda joba synaqtan ótkizildi. 1 qazannan bastap joba respýblıkanyń barlyq aımaǵynda iske qosyldy.
Jobanyń máni tergeýshiniń is-áreketti saralaý, qaıta saralaý, sondaı-aq tergeýdi toqtatý týraly sheshimin sotqa deıingi tergep-tekserýdiń biryńǵaı tiziliminde elektrondy túrde qalyptastyrýda.
Prokýror onlaın rejımde olardyń zańdylyǵyn belgilengen merzimde tekserýge, buzýshylyqtar anyqtalǵan jaǵdaıda den qoıý sharalaryn qabyldaýǵa mindetti.
Mundaı model is júrgizý qujattaryn daıyndaý ýaqytyn jáne tergeý merzimderin qysqartady.
Budan basqa, qylmystyq protseske qatysýshylarǵa qabyldanǵan protsestik sheshimderdi qashyqtan qadaǵalaýǵa, kelispegen jaǵdaılarda olarǵa ýaqtyly shaǵym jasaýǵa múmkindik beriledi.
Bas prokýror bul jańalyqtar aldyn ala prokýrorlyq qadaǵalaýdy qamtamasyz etýge jáne adal azamattardyń qylmystyq qýdalaý sheńberine tartylýyn boldyrmaýǵa baǵyttalǵanyn atap ótti.
Kezdesý qorytyndysy boıynsha Erlan Qoshanov atqarylyp jatqan jumystardyń mańyzdylyǵyn atap ótip, jyl sońyna deıin jobany synaqtan ótkizýdi aıaqtaýdy, normatıvtik-quqyqtyq bazany daıyndaýdy jáne 2021 jylǵy 1 qańtardan bastap Memleket basshysynyń Qazaqstan halqyna Joldaýynda kórsetilgen tapsyrmalaryn iske asyrýǵa kirisýdi tapsyrdy.
