Tergeý ızolıatorynda otyrǵan 4 myńǵa jýyq adam qalaı daýys beredi

NUR-SULTAN. QazAqparat - Tergelip, qamaýda otyrǵan 4 myńǵa jýyq adam prezıdent saılaýynda arnaıy ýchaskede daýys beredi, dep habarlaıdy QazAqparat Qylmystyq atqarý júıesi komıtetiniń baspasóz qyzmetine silteme jasap.

El aýmaǵyndaǵy tergeý ızolıatorlarynda 16 jabyq saılaý ýchaskesi quryldy. Olar ornalasqan jerine qaraı saılaý okrýgterine kiredi.

«Daýys berýge quqyǵy bar tergelip jatqan 4 myńdaı adam elimizde ótetin kezekten tys prezıdent saılaýyna qatysa alady. «Qazaqstan Respýblıkasyndaǵy saılaý týraly» Zańǵa sáıkes, tergeý ızolıatorynda otyrǵan, sot úkimi zańdy kúshine enbegen kámelet jasyna tolǵan adamdar jalpyǵa birdeı saılaý quqyǵyna ıe. Olar 16 jabyq saılaý ýchaskesinde daýys beredi. Bul naýqan kóp jyldardan beri únemi joǵary deńgeıde ótip júr» delingen habarlamada.

Zańǵa sáıkes, tergeý ızolıatoryndaǵy saılaý ýchaskelerine ótkizý rejımi men qoljetimdilik qatań deńgeıde qamtamasyz etiledi.