Tergeý ızolıatorlaryndaǵy baqylaýdy eki ese kúsheıttik – Meıram Aıýbaev
«Basym mindetterimizdiń biri – ol quqyqqa qarsy is-áreketterdiń kez kelgen túrin joıý. Zańnamada bundaı áreketterge qylmystyq jaýaptylyq kózdelgen. Qazaqstan buzýshylyqtardyń, onyń ishinde qatygez, ar-namysty qorlaıtyn jáne ómir men densaýlyqqa qaýipti áreketterdiń aldyn alý boıynsha halyqaralyq mindettemelerdi aldy. Qazaqstan zańnamasy «Nelson Mandela erejeleri» dep atalatyn tutqyndarǵa qatysty mınımaldy standartty erejelerge sáıkes keledi. «Qańtardaǵy oqıǵalarǵa» baılanysty qamaýǵa alynǵan azamattardyń ustaý jaǵdaılaryna qoǵamnyń nazary erekshe aýǵan kezde biz tergeý ızolıatorlaryndaǵy baqylaýdy eki ese kúsheıttik. Qoǵamdyq monıtorıng júrgizýge tolyq múmkindik berdik», - dedi tóraǵa orynbasary Іshki ister mınıstrliginiń baspasóz qyzmeti alańynda ótken brıfıngide.
Onyń atap ótýinshe, QAJ komıtetine qarasty mekemeler jabyq sanalady. Sondyqtan bul jaıta qylmystyq-atqarý júıesine degen senbeýshilikti týdyrýy múmkin. Osyǵan oraı komıtet ashyqtyqty qamtamasyz etý maqsatynda qoǵamdyq-baqylaý komıssııalarmen, úkimettik emes uıymdarmen birge jumys istep jatyr. Olar qamaýdaǵy azamattardyń quqyqtary men ustaý jaǵdaılaryna táýelsiz monıtorıng ótkizedi.
«Máselen, olar 13 tergeý ızolıatorynda 60-tan astam ret boldy. Mekemelerdegi barlyq turǵyn, qyzmettik, kommýnaldyq-turmystyq bólmelerdi qoǵam músheleriniń komıssııasy tekseredi. Tergeý ızolıatorlaryna túsken barlyq adamdar mindetti túrde medıtsınalyq tekserýden ótedi», - dedi ol.
Onyń dereginshe, Adam quqyqtary jónindegi ýákil Elvıra Ázimova, «Adam quqyqtary úshin hartııa» qoǵamdyq qorynyń basshysy Jemis Turmaǵambetova bastaǵan komıssııa qoǵam múshelerimen jáne advokattarmen birge tergeý ızolıatorlarynda ustaý jaǵdaılaryn tekserdi. Olar 6 óńirde tergeýge qamalǵan 100-den astam adamdy qabyldady.
«Sondaı-aq, ustaý jaǵdaılaryn Májilis, máslıhat depýtattary men jergilikti atqarýshy organdar tekserdi. Osy kezdesýlerdiń nátıjesinde mekeme ákimshiligine shaǵymdar túsken joq», - dedi Meıram Aıýbaev.
