Tergeý ızolıatorlarynda daýys berý qalaı ótedi

PETROPAVL. QazAqparat – Búgin Soltústik Qazaqstan oblysynda 12 jabyq saılaý ýchaskesi jumys istep jatyr. Sonyń biri oblys boıynsha qylmystyq atqarý júıesi departamentiniń № 66 mekemesinde ornalasqan, dep habarlaıdy QazAqparat tilshisi.

SQO boıynsha QAJD № 66 mekemesinde, ıaǵnı Petropavldaǵy tergeý ızolıatorynda da saılaý ótti. Bul jerde № 656 saılaý ýchaskesi ornalasqan.

Vedomstvonyń baspasóz qyzmetiniń málimetinshe, tergeý ızolıatorynda qazir 255 adam otyr, olardyń 176-syna qatysty sot úkimi áli zańdy kúshine engen joq.

«Eger sot úkimi zańdy kúshine enbegen bolsa, sottalýshynyń daýys berýge quqy bar. Tańǵy saǵat 7.00-den bastap jumys istep jatyrmyz. Arnaıy algorıtm bar, ıaǵnı kamera boıynsha sottalǵandardy daýys berýge ákeledi. Saılaý ýchaskesinde barlyq qajetti jaǵdaı jasalǵan. Sondaı-aq búgin saılaýǵa baılanysty túski asqa sottalǵandarǵa merekelik as beriledi. Mázirge baýyrsaq, jemis qosylady», - deıdi SQO QAJD № 66 mekemesi bastyǵynyń mindetin atqarýshy Erkin Kópjasarov.

Jazasyn kútkenderdiń arasynda 18 jastaǵy Danııl Karlıýk te bar. Ol alǵash ret saılaýǵa qatysyp, daýys berdi.

«Kirip, daýysymdy berdim. Tez ótti. Al jalpy jastarǵa opyq jemeý úshin, erteń ókinetindeı áreketke barmańdar degim keledi», - dedi Danııl Karlıýk.

Jalpy búgin SQO-da 655 saılaý ýchaskesi jumys istep jatyr. Oblystyq saılaý komıssııasynyń málimetinshe, onyń 12-si – jabyq saılaý ýchaskesi, ıaǵnı olar tergeý ızolıatorynda jáne emdeý mekemelerinde ornalasqan.