Tergeý barlyq sheshimder tizbegin anyqtaýy tıis — Avershın Mańǵystaý oblysyndaǵy qaıǵyly oqıǵa týraly
Quryltaı depýtaty Konstantın Avershın Mańǵystaý oblysynda oqý-jattyǵý kezinde áskerı qyzmetshilerdiń qaza bolýyna baılanysty pikir bildirip, bolǵan oqıǵanyń barlyq mán-jaıyn anyqtap, kinálilerdi jaýapkershilikke tartý kerek degen oıyn bildirdi, dep habarlaıdy Kazinform.
Onyń aıtýynsha, oqý-jattyǵý kezinde 14 áskerı qyzmetshi qaza bolǵan qaıǵyly oqıǵa qoǵamda keń rezonans týǵyzdy.
— Operatsııany kim josparlady? Teńizge túsirý týraly sheshimdi kim qabyldady? Aýa raıyn kim baǵalap, qaýipsizdikke kim jaýap berdi? On tórt adamnyń qazasyna ákep soqqan sheshim nemese áreketsizdik tizbeginde qaı jerde qatelik jiberildi? — dep jazdy depýtat.
Avershınniń atap ótýinshe, tergeý oqý-jattyǵýǵa daıyndyq jáne ony ótkizý kezinde qabyldanǵan barlyq sheshim tizbegin qamtýy tıis.
Onyń pikirinshe, atqaratyn laýazymy men áskerı shenine qaramastan, áskerı qyzmetshilerdiń qaza bolýyna áreketi nemese áreketsizdigi sebep bolýy múmkin barlyq adam jaýapkershilikke tartylýy kerek.
Depýtat sondaı-aq qaıǵyly oqıǵadan keıin qabyldanǵan sharalarǵa nazar aýdardy. Atap aıtqanda, ol Úkimettik komıssııanyń qurylǵanyn jáne Qorǵanys mınıstrliginiń qyzmetine keshendi tekserý júrgizilip jatqanyn eske saldy.
Sonymen qatar Avershın qaza bolǵan áskerı qyzmetshilerdiń otbasylaryna qoldaý kórsetýdiń mańyzdylyǵyn atap ótti.
— Aqsha uldaryn ata-anasyna qaıtara almaıdy. Biraq otbasylar qaıǵy-qasiretimen jalǵyz qalmaýy kerek, — dedi ol.
Sonymen birge depýtat bolǵan oqıǵaǵa qatysty shyndyqqa janaspaıtyn aqparat pen alyp-qashpa sózderdiń taralýyna jol bermeýge shaqyrdy.
Avershınniń aıtýynsha, qoǵamǵa obektıvti tergeý júrgizip, qaıǵyly oqıǵanyń sebepterin anyqtaý qajet.
— Elge arandatý emes, shyndyq kerek. Eger qylmystyq salǵyrttyq anyqtalsa, kináliler eń qatań jazaǵa tartylýy tıis. Eger másele júıeli bolsa, júıeniń ózi ózgerýi kerek, — dedi depýtat.
Ol tergeý barysynda bolǵan oqıǵanyń mán-jaılaryn jasyrmaı, «kináli adamdy qurban etýge» jáne jekelegen laýazymdy tulǵalarǵa erekshe jaǵdaı jasaýǵa jol berilmeýi tıis ekenin atap ótti.
Eske salaıyq, Kaspııdegi qaıǵyly oqıǵa 24 qyrkúıekte oqý-jaýyngerlik tapsyrmany oryndaý kezinde boldy. Aýa raıynyń kúrt nasharlap, jeldiń kúsheıýi saldarynan áskerı qyzmetshilerdi teńiz aǵyzyp áketti.
Buǵan deıin Memleket basshysy Qorǵanys mınıstrligindegi ahýaldy keshendi tekserý jónindegi komıssııa qurýdy tapsyrǵan bolatyn. Komıssııaǵa atqarylǵan jumystyń alǵashqy nátıjeleri týraly Prezıdentke jeti kún ishinde baıandaý tapsyryldy.
Búgin Prezıdent Dáýren Qosanovty Qazaqstannyń Qorǵanys mınıstri qyzmetinen bosatyp, bul laýazymǵa Aıdos Myrzahmetovti taǵaıyndady.
