Terezeni balǵamen syndyrǵan: Elordada kólik tonaýshylar kameraǵa túsip qaldy

NUR-SULTAN. QazAqparat – Elordada túngi ýaqytta kólikterdiń terezesin syndyryp, tonaýmen aınalysqan kúdiktiler ustaldy. Bul jaıynda Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.

Vedomstvo málimetinshe, qaskúnemder eki tún qatarynan «VAZ 21014» markaly 2 avtokólikti tonaǵan. Kúdiktiler avtokólikterden borttyq kompıýterler, avtomagnıtolalar men qysqy dóńgelekterdi alyp ketken.

«Túngi ýaqytta dabyl júıesi ornatylmaǵan «VAZ 21014» markaly avtokólikti baıqaǵan eki jigittiń biri artqy terezeni syndyrý arqyly salonǵa kirgen. Kelesi kúni de urylar dál osy tásilmen ekinshi avtokólikke urlyqqa túsken. Qylmys barysynda olar kólikterdiń apattyq jaǵdaıǵa arnalǵan balǵasyn qoldanǵan», - dep atap ótedi departamentten.

Jedel-izdestirý is-sharalary barysynda polıtsııa qyzmetkerleri 21 jáne 24 jastaǵy eki kúdiktini ustady. Urlanǵan zattar jigitterdiń turǵylyqty jerinen tabylyp, tárkilendi.

Atalǵan faktige sáıkes QR QK-niń 188-baby boıynsha sotqa deıingi tergeý júrgizilýde. Olardyń elorda aýmaǵynda buryn jasalǵan osyǵan uqsas qylmystarǵa qatystylyǵy anyqtalýda», - delingen taratylǵan aqparatta.