Terezeden qulap, jol-kólik oqıǵasyna ushyraǵan sábı jansaqtaý bóliminde jatyr
ASTANA. QazAqparat - Terezeden qulap ketken kishkentaı qyz emhanaǵa barar jolda jol-kólik oqıǵasyna ushyrap, jansaqtaý bólimine tústi, dep habarlaıdy «QazAqparat» HAA tilshisi.
Astana qalasy ІІD baspasóz qyzmeti taratqan málimetterge qaraǵanda, úshinshi qabattan qulap ketken 2014 jyly týǵan sábıdi ata-anasy jeke kóligimen emhanaǵa ákele jatyp, jolda kólik apatyna ushyraǵan.
«Astana qalasynda kishkentaı sábı 3-qabattaǵy páterdiń terezesinen abaısyzda qulap ketedi. Onyń ata-anasy jedel járdemdi kútpesten, zardap shekken balalaryn emhanaǵa jeke avtokólikpen jetkizbekshi bolǵan. Olar mingen kólik Qoshqarbaev kóshesiniń boıynda júk kóligine soǵysyp qalady, sosyn olar jedel járdemdi shaqyrtqan. Atalǵan kólik apaty boıynsha ákimshilik hattama toltyryldy» , - delingen habarlamada.
Zardap shekken bala №2 balalar emhanasyna jatqyzyldy. Dárigerler qulap ketken balanyń densaýlyǵyna qatysty qandaı da bir aqparat berýden bas tartyp otyr. Tek bir jolda eki ret zardap shekken bala týraly vıdeo Rahat Sultanǵazınniń áleýmettik jelisindegi paraqshasynda jarııalanǵan.
Óz kezeginde Astana qalasy ІІD baspasóz qyzmeti turǵyndarǵa barynsha abaı bolyp, mektep jasyna deıingi balalardy eresekterdiń qaraýynsyz qaldyrmaýǵa keńes berýde.
