Terezeden balalaryn laqtyryp jibergen almatylyq áıeldi sot májbúrli emdelýge joldady
ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq soty kópqabatty úıdiń besinshi qabatynan balalaryn laqytyryp jibergen J.Qulmamyrovaǵa qatysty qylmystyq isti qarady. Bul týraly qalalyq sottyń baspasóz qyzmeti habarlady.
Eske sala keteıik, J.Qulmamyrova osy jylǵy 5 qyrkúıekte esinen aıyrylǵan jaǵdaıda jaldap otyrǵan besinshi qabattaǵy páteriniń balkonynan óziniń kishkentaı balalaryn laqtyryp jibergen. Kishi qyzy aýyr dene jaraqatyn alyp, tiri qaldy. Úlken qyzy qulaǵan jerinde jan tapsyrdy. Budan keıin J.Qulmamyrovanyń ózi de terezeden sekirdi, biraq ta tiri qalǵan.
Sottalýshy QR Qylmystyq kodeksiniń 3-bólimi 24-babynda, 2-shi bóliminiń 99-babyndaǵy 3-shi, 5-shi jáne 14-shi tarmaqtarynda (eki jáne odan da kóp kámeletke tolmaǵan adamdardy kórineý qasaqana óltýirýge oqtalý), 2-bóliminiń 99-babynyń 1-shi, 3-shi, 14-shi tarmaqtarynda (kórineý dármensiz jaǵdaıdaǵy eki jáne odan da kóp adamdardy jáne kórineý kámeleketke tolmaǵandardy qasaqana óltirý) kózdelgen qylmystar jasaýǵa aıyptalyp, sot aldynda jaýap berdi.
Sot aldyndaǵy tergeý barysynda sot-psıhologııalyq saraptama ótkizildi, ol J.Qulmamyrova qylmys jasaǵan sátte júıkesi juqaryp, esýastyq jaǵdaıǵa túskeni týraly qorytyndy berdi.
Sot qaýlysymen J.Qulmamyrova qatań baqylaýmen júıke aýrýlary statsıonaryna májbúrli túrde emdelýge jiberildi.
