Bas prokýratýra balalardyń terezeden qulaýyna baılanysty turǵyndarǵa eskertý jasady
ASTANA. KAZINFORM – Kúnniń erte jylýyna baılanysty elde turǵyn úılerdiń terezelerinen jas balalardyń qulap ketý jaǵdaılary tirkele bastady, dep habarlaıdy Bas prokýratýranyń baspasóz qyzmeti.
Negizgi sebep – eresekter tarapynan tıisti baqylaýdyń bolmaýy. Tájirıbe kórsetkendeı, kópjaǵdaıda balalar qysqa ýaqytqa bolsa da qaraýsyz qalady, bunyń sońy qaıǵyly jaǵdaıǵa dýshar etip jatady. Ashyq terezeler men aldamshy qaýipsizdik sezimin qalyptastyratyn moskıttik torlardyń bolýy erekshe qaýipti.
- Moskıttik tor balanyń salmaǵyna eseptelmegenin jáne ony ustap tura almaıtynyn esten shyǵarmaǵan jón. Júrgizilip jatqan aqparattyq-túsindirý jumystaryna qaramastan, mundaı oqıǵalar jylsaıyn tirkelip jatyr. Memleket tarapynan mundaı jaǵdaılardyń aldyn alýǵa baǵyttalǵan qajetti zańnamalyq sharalar qabyldanǵan. Atap aıtqanda, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańǵa sáıkes (27-2-baptyń 2-tarmaǵy jáne 27-2-baptyń 3-tarmaǵy) qurylys salýshylar jańa turǵyn úılerde tereze oıyqtaryn qulyptarmen jáne qaýipsizdik mehanızmderimen qamtamasyz etýge mindetti. Sondaı-aq «Turǵyn úı qatynastary týraly» Zańǵa sáıkes (51-1-baptyń 5-tarmaǵynyń 3 tarmaqshasy, 51-5-baptyń 2-tarmaǵynyń 3 tarmaqshasy jáne 51-6-baptyń 4-tarmaǵynyń 2 tarmaqshasy) páter ıeleriniń qaýipsiz turýyn qamtamasyz etý máseleleri múliktiń menshik ıeleri birlestigi, páterler menshik ıeleriniń kooperatıvi jáne basqarýdyń ózge de nysandarynyń quzyretine jatady. Soǵan qaramastan negizgi sebep – adamı faktor bolyp qala beredi,-delingen habarlamada.
Osyǵan baılanysty Bas prokýratýra ata-analardyń nazaryn qarapaıym qaýipsizdik erejelerin saqtaýdyń mańyzdylyǵyna aýdarady:
1) jas balalardy qaraýsyz qaldyrmaý;
2) jıhazdy tereze mańyna qoımaý;
3) terezelerge arnaıy blokıratorlar men shekteýishter ornatý;
4) balanyń terezege óz betinshe qol jetkizý múmkindigin boldyrmaý.
Kámeletke tolmaǵandardyń qaýipsizdigin qamtamasyz etý boıynsha sharalar qabyldamaǵany úshin ÁQBtK-niń 127-babyna sáıkes 20 AEK-ke deıin aıyppul nemese 10 táýlikke deıin ákimshilik qamaq túrinde jaýapkershilik kózdelgen. Tek 3 aıdyń ishinde osy bap boıynsha 8 myńnan astam ata-anamen zańdy ókil jaýapqa tartyldy.
-Balalardyń ómiri men densaýlyǵy úshin birinshi kezekte jaýapkershilik ata-analarǵa júkteletinin túsiný qajet. Bas prokýratýra azamattardy qyraǵylyq tanytýǵa jáne qaıǵyly jaǵdaılarǵa ákelýi múmkin jaǵdaılarǵa jol bermeýge shaqyrady,-delingen Bas prokýratýranyń baspasóz qyzmeti taratqan aqparatta.
Aıta keteik, elde balalardy terezeden qulaýdan qorǵaýǵa baǵyttalǵan respýblıkalyq naýqan bastaldy.
Osyǵan deıin Astanada balalardyń terezeden qulaýy keıingi úsh jylda kóbeıgeni týraly jazdyq.
