Terezede otyryp jaýap alatyn tergeýshiler bar – Qasymov ǵımarat tapshylyǵy jaıly
ASTANA. QazAqparat - Іshki ister mınıstri Qalmuhanbet Qasymov ishki ister organdary qyzmetterine ǵımarat kerektigin málim etti, dep habarlaıdy QazAqparat tilshisi.
«El ortalyǵy Almatydan Astanaǵa kóshkeli beri birde-bir ІІD, TJD nemese QAJD ǵımaraty salynǵan joq. Al qala, ózderińiz kórip otyrǵandaı, qatty ósip, halyqtyń sany mıllıonnan asyp ketti. Bizdiń aýdandyq bólimshelerdiń biri ákimdik jeke tulǵadan jalǵa alǵan kottedjde otyr. Tereze aldyndaǵy taqtaıǵa súıenip, adamdardan jaýap alyp jatqan tergeýshiler bar. Adamdarǵa keıde dálizde kezek kúttirip, aryzdary boıynsha jaýap alýdy kútip turǵan kezde tipti uıalamyz. Bul - óte kúrdeli jaǵdaı. Biz bul máseleni burynnan kóterip kelemiz, másele endi ǵana sheshilgeli jatyr», - dedi Qalmuhanbet Qasymov OKQ-da ótken baspasóz máslıhatynda.
Mınıstrdiń aıtýynsha, polıtsııa qyzmetkerleriniń kóbi mundaı jaǵdaıda jumys atqarýdan bas tartqan. Osy sebepti mınıstr Astanada eńbek etetin qyzmetkerler ózge óńirlerge aýysa almaıtyndaı buıryq shyǵarǵan. Keı tártip saqshylary Astanaǵa kelip, jumys isteýge yntalanǵanymen, az ýaqyttan keıin basqa jaqqa aýysý jóninde baıanat jazatyn kórinedi.
«Astanadaǵy ózge qyzmetterdi aıtpaǵan kúnniń ózinde, bizde tergeýshiler, anyqtaýshylar men jedel qyzmetkerlerdiń jetispeýshiligi aıqyn seziledi. «Ramada Plaza» boıynsha birshama suraqtar týyndaǵan bolatyn. Ol birneshe ret satyldy. Búgin-erteń qaýly shyqqan jaǵdaıda biz ol ǵımaratty qabyldap alamyz», - dep túıdi mınıstr.
Eske sala ketsek, osyǵan deıin Іshki ister mınıstri Qalmuhanbet Qasymov Astana qalalyq ishki ister departamentin «Ramada Plaza» qonaq úıi ǵımaratyna ornalastyrý máselesine qatysty túsinikteme bergen bolatyn. Ol óz sózinde atalmysh ǵımaratty ishki ister organdary úshin arnaıy surap otyrǵanyn aıtqan edi.
