Tereza Meı: Qazir Shotlandııanyń táýelsizdigi úshin referendým ótkizetin kez emes
ASTANA. QazAqparat - Ulybrıtanııanyń premer-mınıstri Tereza Meı qazir Shotlandııa táýelsizdigi jaıly ekinshi referendým ótkizetin ýaqyt emes ekenin málimdedi, dep habarlaıdy Bı-bı-sı.
Meı bolashaqta referendým ótkizý jaıly naqty aıtpady.
Bul aptada Shotlandııanyń birinshi mınıstri Nıkola Sterdjen shotlandtyqtardyń kópshiligi «breksıtke» qarsy daýys bergendikten jáne olardyń Eýroodaqta qalǵysy keletindikterinen óńirlik parlamentten táýelsizdik týraly ekinshi referendým ótkizýge ruqsat suraıtynyn habarlady.
Alaıda Meı Brıtanııa men EO bolashaq qarym-qatynasy anyqtalmaı turyp, halyqta sheshim qabyldaýǵa qajetti aqparat bolmaı turyp, daýys berýdi júrgizý ádiletsizdik ekenin málimdedi.
Shotlandııa isteri boıynsha mıınstr Devıd Mandel «Tvıtterge» «Breksıtten» buryn referendým ótkizýdiń ádiletsiz ekenin jáne oǵan eshkimniń kelispeıtinin jazdy.
Meıdiń aıtýynsha, onyń nazary EO-dan shyǵý týraly kelissózder kezinde Brıtanııa úshin meılinshe tıimdi mámileni izdeýge baǵyttalyp otyr.
"Táýelsizdik týraly referendýmdy talqylaý Shotlandııa boıynsha úzdik kelisimdi jáne Brıtanııa úshin tıimdi kelisimdi bekitýdi qıyndata túsedi», - dedi ol.
«Meniń oıym anyq - qazir referendýmdy oılaıtyn ýaqyt emes», - dep tolyqtyrdy óz sózin.
Sonymen birge, premer-mınıstr eldiń bólinbeýin, kerisinshe birigip jumys isteý kerektigin basa aıtty.
