Terekti aýdanynda kásipkerlikti damytý baǵytynda 22 adam 113,9 mln teńge nesıe aldy - BQO
ORAL. QazAqparat - Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń 2-baǵyty (jappaı kásipkerlikti damytý) boıynsha Terekti aýdanynda 22 adam 113,9 mln teńge nesıe aldy. Bul týraly búgin óńirlik kommýnıkatsııalar qyzmeti alańynda aýdan ákimi Kárim Jaqypov málim etti, dep habarlaıdy «QazAqparat» tilshisi.
Onyń aıtýynsha, sonyń ishinde 13 adam «Aýyl sharýashylyǵyn qarjylaı qoldaý qory» AQ-nyń oblystyq fılıaly arqyly 75,9 mln teńge, 9 adam «Agrarlyq nesıe korporatsııasy» AQ arqyly 38,0 mln teńge nesıege qol jetkizdi.
Nátıjeli jumyspen qamtýdyń «Baǵdarlamaǵa qatysýshylardy tehnıkalyq, kásiptik bilimmen jáne qysqa merzimdi kásiptik oqýmen qamtamasyz etý» 1-baǵyty boıynsha kásiptik oqýǵa 240 adam joldanyp, jospar tolyqtaı oryndaldy.
Jyl basynan beri aýdandyq jumyspen qamtý ortalyǵyna 2331 adam jolyqty. 162 adam jumyssyzdar sanatynda esepte tur. Bul ótken jylǵydan 22 paıyzǵa kóp. Resmı jumyssyzdyq deńgeıi - 1,0 paıyz, bul ótken jylǵydan 0,3 tarmaqqa joǵary.
Turmysy kedeılik sheginen tómen adamdar sany - 119 (29 otbasy), bul kórsetkish ótken jylǵymen salystyrǵanda, 13,2 paıyzǵa joǵary.
«Dıplommen aýylǵa» baǵdarlamasy boıynsha 128 jas mamanǵa 197 837,4 myń teńge áleýmettik qoldaý sharalary kórsetildi.
Sol sekildi «Órleý» baǵdarlamasy aıasynda 14 aýyldyq okrýgten 43 otbasy, onyń ishinde 223 adamǵa 10 mln 944,8 myń teńge kóleminde shartty túrde aqshalaı kómek taǵaıyndalyp, 8 mln 421,1 myń tólendi. 
Munyń bári Elbasy tapsyrmasyna sáıkes jumyssyzdyqty barynsha tómendetý, jańa jumys oryndaryn ashyp, halyqtyń ál-aýqatyn kóterý baǵytynda jasalýda.
Aıta keteıik, Terekti aýdanynyń bıýdjeti - 7943,3 mln. teńge, sonyń ishinde aýdannyń óz kirisi - 1155,4 mln teńge. Salyq túsimderi boıynsha toǵyz aıdaǵy jospar 140,9 paıyzǵa oryndalyp, 960,8 mln teńge boldy.
Toǵyz aıda 1113,6 mln teńgeniń ónerkásip ónimi óndirildi, bul ótken jylǵymen salystyrǵanda, 104,2 paıyz. Aýdandaǵy negizgi kásiporyndar - «B.N GasOil Processing» JShS (óndiretini - aýyr dıstıllıanttyq suıyq otyn, gazoıldyq fraktsııa, qaıta aıdaý qaldyqtary), «Jaıyqgıdrogeologııa» JShS (alkogolsyz sýsyndar), «Terekti maı kombınaty» JShS (tazartylǵan jáne tazartylmaǵan kúnbaǵys maıy).
Aldaǵy ýaqytta bir ınvestıtsııalyq jobany júzege asyrý kózdelýde. Bul - munaı ónimderin qaıta óńdeý zaýyty qurylysy («ABS-munaı» JShS). Osy joba oıdaǵydaı júzege assa, 200-den astam jumys orny ashylyp, munaı ónimderin shyǵarý jylyna 0,8-1 mln tonnaǵa jetpekshi.
Aýdanǵa negizgi qarjyǵa qosylǵan ınvestıtsııa kólemi 3 mlrd 083,1 mln teńgege jetti.
Turǵyn úı qurylysyna 1 mlrd 089,3 mln teńge ınvestıtsııa salynyp, ótken jylǵydan 6,4 esege ósip otyr. Sol sııaqty aýyl sharýashylyǵyna salynǵan ınvestıtsııa kólemi 14,4 esege artty.
