Terekti aýdanynda aýdandyq aýrýhanany kúrdeli jóndeý kózdelýde - BQO
ORAL. QazAqparat - Terekti aýdanynda bıyl aýdandyq aýrýhanany kúrdeli jóndeý kózdelýde, dep habarlaıdy «QazAqparat» HAA tilshisi.
Jobalyq-smetalyq quny 490 mln. teńgeni quraıtyn qurylys jumystary aldaǵy kóktemde bastalmaqshy. Aýrýhana dırektory Madııar Óteshevtiń sózine qaraǵanda, ǵımarat 1985 jyly salynǵannan beri kúrdeli jóndeý kórmegen.
Jalpy, aýdanda alty eldi mekende jańadan densaýlyq saqtaý nysandaryn salý qajet. 20 nysan kúrdeli jóndeýdi qajet etedi. 2017 jyly 14 nysandy kúrdeli jóndeýge jobalyq-smetalyq qujattama jasalmaqshy. Aýdan ortalyǵy Fedorovta beıimdelgen ǵımaratta ornalasqan emhana da jańadan turǵyzýdy qajet etedi.
Sol sekildi aýdanda barlyǵy 52 eldiń mekenniń tek 32-si ǵana gazdandyrylǵan. 16 eldi mekenge gaz qubyryn tartý úshin qazirgi kezde 18 mln. teńgege tehnıkalyq-ekonomıkalyq negizdeme jasalýda.
Ótken jyldan beri 4 eldi mekende 463,4 mln. teńgege elektr jelileri tartylýda. Bul jumys bitken kezde 1329 aýyl turǵynyna jeke úı salý úshin jer telimderi beriledi.
Terektide áleýmettik nysandar jumysymen tanysyp, aýdan ákimi Murat Muqaevtyń turǵyndarmen eseptik kezdesýine qatysqan óńir basshysy Altaı Kólginov Elbasy tapsyrmasyna sáıkes halyqtyń ál-aýhatyn arttyrýdy únemi nazarda ustap, áleýmettik sala máselelerin ýaqytynda sheshý qajettigin atap kórsetti. Mysaly, oblysta aýyldyq eldi mekenderdi aýyz sýmen qamtý ótkir tur. 440-tan astam eldi mekenderdiń tek 36 paıyzy aýyz sýmen qamtylǵan. Osyǵan oraı 2017-2018 jyldary 50 aýyldy ortalyqtandyrylǵan sý kózine qosý úshin 11 mlrd. teńge bólindi. Sonyń ishinde Terekti aýdanynan Aqjaıyq, Ańqaty, Aqsýat, Novopavlov jáne Saryómir aýyldary bar. Sol sekildi óńirde avtojoldardyń 26 paıyzy ǵana qatqyl tabandy bolyp esepteledi. Ótken jyly el qazynasynan 16,5 mlrd. teńge qaralyp, 250 km jol retke keltirildi. Bul jumys bıyl da jalǵasady. Sondaı-aq eldi mekenderdi gazdandyrý máselesi únemi nazarda bolýy tıis.
Osylardy qaperlegen oblys basshysy aýdan ákimi Murat Muqaevqa naqty tapsyrmalar berdi.
Aıta keteıik, qazirgi tańda Terekti aýdanynda 37922 adam turady. 2016 jylǵy aýdan bıýdjeti 6 mlrd. 740,9 mln. teńgege jetip, aldyńǵy jylmen salystyrǵanda, 36,5 paıyzǵa ósti. Salyq túsimderi esebinen jergilikti bıýdjetke 1 mlrd. 096,1 mln. teńge tústi, bul - jyldyq boljamnyń 115 paıyzy. Bıýdjet shyǵyndarynyń negizgi bóligi nemese 4 mlrd. 716,9 mln. teńge áleýmettik salaǵa, al 666,8 mln. teńge turǵyn úı-kommýnaldyq sharýashylyq salasyna jumsaldy. Ótken jyly 4 mlrd. 227,4 mln. teńgeniń ónerkásip ónimderi óndirildi. 
