Terek mamyǵy órttiń týyndaýyna sebep bolýy múmkin
ASTANA. QazAqparat - Astana qalasynyń Tótenshe jaǵdaılar departamenti terek mamyqtaryn órteý óte qaýipti ekendigin eskertedi, dep habarlaıdy Astana qalasy ákimdiginiń resmı saıty.
Balalar terek mamyqtaryn tutandyryp oınaýǵa áýes keledi. Ot jalynynyń «aq kilem» ústimen tez taralatyndyǵyna qyzyǵa qaraıdy. Alaıda mundaı ermek isterdiń úlken órttiń týyndaýyna, tipti adam ólimine ákelýine sebepshi bolýy múmkin.
Byltyr terek mamyqtaryn jaǵý saldarynan nysandar men qurylystarǵa órt taralý oqıǵasy tirkeldi. Máselen, Gete kóshesinde 2 fakt tirkeldi, oǵan terek mamyqtaryn jaǵý sebep bolǵan. Órt saldarynan úsh garaj ben úsh sharýashylyq qurylysy zaqymdaldy.
Balalar ǵana emes, eresekter de shylym nemese sirińkeni sóndirmegen kúıde laqtyryp, terek mamyqtarynyń tutanýyna sebepshi bolady. Terek mamyqtary tez tutanady, oq-dári sekildi joıqyn kúshpen jan-jaqqa tarap, sońynan qara tútin qaldyrady. Órt sanynyń artýyna sebep bolady. Ásirese aǵashtan jasalǵan qurylystar, sondaı-aq garajdar men kólik turaqtary órttiń shyǵý qaýpine beıim. Eger bulardyń mańynda gaz qubyrlary bolsa, jaǵdaı tipti qıyndaı túsedi. Sondyqtan barshamyzǵa saq bolǵan jón.
Osyǵan oraı Astana qalasynyń TJD qala turǵyndary men qonaqtaryna qarapaıym órt qaýipsizdigi talaptaryn saqtaý qajettiligin eskertedi, talaptar oryndalmaǵan jaǵdaıda sońy orny tolmas qaıǵyǵa soqtyrýy yqtımal.
