Teraktide jaraqat alǵan qarý dúkeniniń satýshysyn qutqarǵan Aqtóbe medbıkesi marapattaldy
Oqıǵa bolǵan kúni «Pantera» dúkeniniń satýshysy Almat Rahmetov aýyr jaralanyp, aýrýhanaǵa túsken bolatyn. Dárigerler Almattyń aman qalýy alǵashqy kómek kórsetken medbıkeniń arqasy ekenin aıtqan edi. Oqıǵanyń qalaı bolǵanyn medbıkeniń ózinen suradyq.
«Men «Pantera» dúkeni ornalasqan úıdiń ekinshi qabatynda turamyn. Sol kúni tústen keıin, saǵat úshtiń shamasynda bireý esik qaǵyp, kómek surady. Esikti ashsam, ústi-basy qan azamat dúkende atys bolǵanyn, kómektesýimdi ótindi. Alǵashqyda sasyp qaldym, biraq dereý esimdi jıyp úıge kirgizdim. Kóshedegi tóbelesten bolǵan shyǵar dep oıladym. Óıtkeni sol ýaqytta úıdiń aınalasynan tarsyldaǵan dybystar shyǵyp jatty. Satýshynyń basy jaralanǵan, qulaǵy terisinen bólinip tur. Keýdesinen de jaraqat alǵan, aıaǵynyń súıegi kórinedi. Qannyń kóp ketkeni sondaı, denesi kórinbeıdi. Dereý tańǵysh alyp, qandy toqtatýǵa tyrystym. Jedel járdem kóligin shaqyrttyq. Biraq kólik úsh saǵattan keıin keldi. Óıtkeni bizdi kepildikke aldy dep oılap, kelýge qoryqsa kerek. Úıdegi eki ulym qorqyp, bólek bólmege ketti. Jubaıym telefon tutqasyn alyp úzdiksiz jedel járdem shaqyrýmen boldy», - deıdi Stella.
Oqıǵa ornyna polıtsııa qyzmetkerleri jetkennen keıin, Stellanyń kúıeýi terezeden aıqaılap, jaraqat alǵan adamnyń ólim aýzynda jatqanyn aıtady. Іshki ister qyzmetkerleri aldymen úıden úı ıesiniń ózi shyqsyn deıdi. Terezeden túsken kúıeýi mán-jaıdy aıtqan soń, jedel járdem kóligi Almatty aýrýhanaǵa alyp ketedi.
«Jedel járdem qyzmetkerleri kelgenshe jaraqat alǵan adamnyń qasynda boldym. Ol da azamat eken, qınalsa da shydaýǵa tyrysyp jatty. Jalpy bundaı jaǵdaı medbıkelerge jaqsy tanys. Ózimniń 18 jyl eńbek ótilimde aýyr jaraqat alǵan talaı adamǵa kómektestim. Sodan bolar úreılený, qorqý, sekildi sezim bolǵan joq, tek qalaıda qandy toqtatyp, jedel járdem kóligi kelgenshe aman alyp qalýdy oıladym», - deıdi Stella.
Almat Rahmetovke medıtsınalyq kómek kórsetilgennen keıin, apasy kelip Stellaǵa alǵysyn aıtyp ketti.
«Bul meniń dárigerlik qyzmetim, bireýge istegen jaqsylyǵymdy mindet qylýdan aýlaqpyn. Biraq adamdardyń osyndaı ystyq yqylasy kóńilime erekshe qýanysh syılaıdy», - dedi medbıke.
«Darý» ońaltý ortalyǵynda ótken jıynda qala ákiminiń orynbasary dárigerlerdi tól merekesimen quttyqtap, olardyń otbasylaryna amandyq tiledi. Sondaı-aq terrorlyq áreket kezinde mindetin múltiksiz oryndaǵan medbıke Stella Moldımanovanyń eńbegin joǵary baǵalap, Alǵys hat tabystady.
Stella Maratqyzynyń «Darý» ortalyǵynda jumys istegenine úsh jyldan asypty. Ortalyq dırektory Ǵalymjan Eleýov te medbıkeniń erligine rızashylyǵyn bildirip, alǵys aıtty. Sondaı-aq mereke qarsańynda ózge de dárigerler men medbıkelerdi ortalyq atynan quttyqtap, Alǵys hattar tabys etti.
Kámshat QOPAEVA
