Terakt kezinde jarǵyny buzǵan áskerılerdiń biri Prezıdentten arasha surady
AQTÓBE. QazAqparat - Aqtóbe qalasynda 5 maýsymda oryn alǵan terrorıstik akti kezinde jarǵyny buzdy dep aıyptalǵan 6655 áskerı bólimniń burynǵy qyzmetkerleri Qaınarbek Tastambekov pen Qaıyrǵalı Orazjanov búgin sotta sońǵy sózderin aıtty, dep habarlaıdy QazAqparat agenttigi.
«Men ózimdi kináli sanamaımyn. Maǵan taǵylǵan aıyppen kelispeımin. Bul jerde sottyń aldynda men emes, menen de jaýapty adamdar otyrýy kerek edi. Kináli emestigimdi dáleldeıtin derekter bolmady. Eger men shynymen aıypty bolsam, osy maıor shenine deıin qalaı jetkenmin, qalaı aıaq astynan qylmysker bolyp shyǵa keldim. Tergeý barysynda meni úreılenip, qashyp-pysyp júrgen qylyp qoıdy. Men ədildikti izdeımin. Qazir Prezıdentke ashyq hat joldap, oqıǵanyń jaı-japsaryn tolyq baıandadym»,-dedi aıyptalýshy Qaınarbek Tastambekov.
Aıta ketý kerek, memlekettik aıyptaýshy maıorǵa 3 jylǵa bas bostandyǵynan aıyrý jazasyn taǵaıyndaýdy surap otyr. Al ekinshi aıyptalýshy Qaıyrǵalı Orazjanov ózine taǵylǵan aıypty tolyq moıyndap, zardap shekkenderden keshirim surady. Əskerıler isine qatysty sot úkimi erteń shyǵady.
Toqtala ketetin jaıt, áskerılerge "Qarýly shabýyl kezinde qyzmetine nemquraıly qarady jáne áskerı jarǵyny buzdy" degen aıyp taǵylǵan bolatyn. Terrorıstik top tutqıyldan shabýyl jasaǵanda ekeýi de áskerı jarǵyǵa saı áreket etpegen. Aıyptaý materıaldarynda kórsetilgendeı, besinshi maýsym kúni Qaınarbek Tastambekov kezekshi, al Qaıyrǵalı Orazjanov kómekshisi bolǵan. Tergeý qorytyndysy boıynsha, olar mindetterin oryndaýdyń ornyna dárethana terezesinen sekirip, qashyp ketip, sonyń kesirinen adamdar oqqa ushqan. Alaıda, ofıtserlerdiń biri ózine taǵylǵan aıypty moıyndamady.
Esterińizge salsaq, Aqtóbe maýsymdaǵy terakt kezinde 7 adam qaza bolyp, 30-y jaraqattandy. Arnaıy operatsııa kezinde 18 terrorıstiń kózi joıylyp, toǵyzy ustalǵan bolatyn.
Zada Zeıin
