«Teńizshevroılge» 639,6 mln teńge kóleminde aıyppul salyndy

ASTANA. KAZINFORM — Tabıǵatty qorǵaý prokýrorlary «Teńizshevroıl» JShS-ne 639,6 mln teńge kóleminde aıyppul saldy, dep habarlaıdy Atyraý oblysynyń prokýratýrasy.

Mamandandyrylǵan tabıǵat qorǵaý prokýratýrasy atmosferalyq aýanyń lastanýyna qatysty ekologııalyq qaýipsizdik máseleleri boıynsha taldaý júrgizip, birqatar óreskel zań buzýshylyqty anyqtady.

— «Teńizshevroıl» JShS 2023 jyldyń 3 jáne 4-toqsanynda, sondaı-aq 2024 jyldyń 1 jáne 2-toqsanynda atmosferaǵa ekologııalyq ruqsat etilgen normalardan tys 49,3 tonna lastaýshy zattardy shyǵarǵan. Onyń ishinde 4,9 tonna lastaýshy zat qorshaǵan ortaǵa arnaıy ruqsatsyz tastalǵany anyqtaldy. Osyǵan baılanysty, «Teńizshevroıl» JShS-ne qatysty prokýrordyń qaýlysymen ákimshilik is qozǵalyp, sotpen 639,6 mln teńge kóleminde aıyppul salyndy. Bul sheshim zańdy kúshine endi, — delingen habarlamada.

Aıta keteıik, aımaqta atmosferalyq aýanyń lastanýy — ózekti máselelerdiń biri sanalady jáne bul baǵyttaǵy qadaǵalaý jumystaryn prokýratýra turaqty túrde júzege asyryp keledi.

Buǵan deıin Mańǵystaýda káriz qubyry jarylyp, qorshaǵan ortany lastaǵanyn jazǵan edik.