«Teńizshevroıl» kompanııasyna jańa bas dırektor taǵaıyndaldy
ATYRAÝ. KAZINFORM — Búgin «Teńizshevroıl» JShS-niń bas dırektory laýazymyna Ýılıam Lakobı taǵaıyndalady. Bul qyzmetti 2021 jyldan beri bas dırektor bolǵan Kevın Laıon atqarǵan edi.
Kompanııanyń baspasóz qyzmetinen málim etkendeı, Ýılıam Lakobıdiń bul salada 31 jyldyq eńbek ótili bar.
— Ol «Shevron» kompanııasynyń AQSh, Angola jáne Indonezııadaǵy bıznes bólimshelerinde túrli ınjenerlik-tehnıkalyq, basshylyq qyzmetterdi atqarǵan. 2021 jyldan beri Ońtústik Afrıkadaǵy strategııalyq bıznes bólimshesiniń basqarýshy dırektory boldy. Bul qyzmetinde Angola men Kongo Respýblıkasyndaǵy «Shevron» kompanııasynyń aktıvterine, onyń ishinde Angoladaǵy suıytylǵan tabıǵı gaz óndirisiniń iri jobasyna jetekshilik etip, jergilikti qamtý jáne kadrlardy damytýǵa, jergilikti halyqtyń ál-aýqatynyń artýyna yqpal etken basshy retinde tanyldy, — dep habarlady kompanııanyń baspasóz qyzmeti.
Al burynǵy bas dırektor Kevın Laıon «Shevron» kompanııasynyń bas keńsesindegi jańa basshylyq qyzmetke taǵaıyndalǵan. Onyń basshylyǵymen TShO Keleshek keńeıý jobasyn júzege asyrdy.
— Kúrdeli synaqtar men mańyzdy belesterge toly kezeńde TShO-nyń basshysy bolý men úshin zor mártebe boldy. TShO ujymy Qazaqstan ıgiligine qyzmet etýin ári qaraı da jalǵastyrady degen nyq senimdemin. Búgin qyzmetimdi Ýılıam Lakobıge tapsyramyn. Qazaqstan úkimetine, TShO aktsıonerlerine, adal qyzmetkerlerimiz ben bıznes-seriktesterimizge jáne Atyraý turǵyndaryna jyldar boıy kórsetip kele jatqan qoldaýy men yntymaqtastyǵy úshin shyn júrekten alǵysymdy bildiremin, — dedi Kevın Laıon.
TShO-nyń bas dırektory qyzmetine kirisken Ýılıam Lakobıdiń pikirinshe, Teńiz ken orny tehnıkalyq turǵydan dúnıe júzindegi eń kúrdeli ken oryndarynyń biri bolyp qala beredi.
— Kompanııanyń basty baǵyty — ken ornynda qaýipsiz ári senimdi óndiristi qamtamasyz etý. Qazaqstan ekonomıkasynyń órkendeýine yqpaldasý baǵytynda Qazaqstan Úkimetimen, aktsıonerlerimizben, sonymen birge ózimiz turyp, qyzmet etip otyrǵan óńirdiń turǵyndarymen ózara seriktestigimizdi odan ári nyǵaıtý múmkindigin jalǵastyramyz, — dedi Ýılıam Lakobı.
Eske sala ketelik, buǵan deıin Qazaqstan men ExxonMobil munaı-gaz jobalary boıynsha ózara is-qımyldy kúsheıtetini habarlanǵan bolatyn.
Aıta keteıik, saıasat, ekonomıka, bıznes, ǵylym, mádenıet sekildi túrli salada el damýyna eleýli úles qosqan tanymal qazaqstandyqtardyń ómirbaıany men qyzyqty málimetterdi myna jerden oqı alasyz.