TShO bıyl Qazaqstannyń ishki naryǵyn 240 myń tonna suıytylǵan gazben qamtıdy
ASTANA. KAZINFORM – Energetıka mınıstrligi men «Teńizshevroıl» JShS (TShO) ishki naryqqa turaqty túrde suıytylǵan munaı gazyn jetkizýdi qamtamasyz etetin ózara túsinistik týraly jyl saıynǵy memorandýmdy uzartý týraly kelisimge qol qoıdy.
Qujat vedomstvo men kompanııa arasyndaǵy syndarly kelissózderdiń nátıjesinde rásimdeldi. Kelisimge sáıkes, 2025 jyly TShO Qazaqstannyń ishki naryǵyna 240 000 tonna suıytylǵan munaı gazyn (SMG) jetkizedi.
– Eń aldymen, suıytylǵan munaı gazy – bul búkil álemde tek avtokólik otyny retinde ǵana emes, sonymen qatar munaı-gaz hımııasyn damytý úshin qundy kómirsýtek shıkizaty retinde paıdalanylatyn mańyzdy resýrs ekenin atap ótkim keledi. Bul kelisimniń jasalýy – respýblıkanyń suıytylǵan munaı gazyna degen ishki qajettiligin qamtamasyz etýdegi mańyzdy qadam sanalady. Qazaqstan Respýblıkasyndaǵy suıytylǵan munaı gazyn óndirýshilerdiń biri retinde seriktesimiz TShO-dan jetkiziletin kepildendirilgen gaz ishki naryqtaǵy tapshylyqty azaıtýǵa jáne osy ónimdi tutynýshylar úshin qolaıly jaǵdaı jasaýǵa múmkindik beredi, - dedi Energetıka vıtse-mınıstri Álibek Jamaýov.
Óz kezeginde TShO bas dırektory Kevın Laıon TShO ishki naryqqa taýarlyq gazdyń negizgi jetkizýshileriniń biri bolyp qala beretinin jáne el úshin osy strategııalyq mańyzdy saladaǵy áleýetti múmkindikterdi zertteý úshin Qazaqstanmen yntymaqtastyqty jalǵastyryp jatqanyn atap ótti. Ol sondaı-aq kompanııa Energetıka mınıstrliginiń maqsattaryna qoldaý kórsetýdi jalǵastyratynyn jáne eldiń ónerkásiptik jáne ekonomıkalyq damýyna óz úlesin qosýǵa tyrysatynyn jetkizdi.
Aıta ketý kerek, TShO Qazaqstan Respýblıkasynda munaı-hımııa ónerkásibiniń damýyna da yqpal etip keledi. Keıingi birneshe jyl ishinde TShO KPI kompanııasyna propan shıkizatyn, «Býtadıen» jobasy úshin býtan jáne «Polıetılen» jobasy úshin etan jetkizý týraly qujattarǵa kelisip, qol qoıdy.
Buǵan deıin Atyraý oblysyna 7 myń tonnadan astam suıytylǵan gaz jetkizilgenin habarlaǵan edik.