«TeńizShevroıl» 246 qyzylordalyqty jumystan nege qysqartty

QYZYLORDA. KAZINFORM – Qyzylorda oblystyq jumyspen qamtýdy úılestirý jáne áleýmettik baǵdarlamalar basqarmasy áleýmettik áriptestik sheńberinde jumysshylardyń jumystan bosatylýyna turaqty túrde monıtorıng júrgizdi.

Monıtorıng nátıjesinde jyl basynan beri 43 kásiporynda 515 adam jumystan bosatylǵan. Onyń ishinde jergilikti 17 mekemeniń 269 jumysshysy bar. Qalǵan 246-sy Atyraýdaǵy «TeńizShevroıl» kompanııasynyń enshiles kompanııalarynan. 

— «TeńizShevroıl» júrgizgen qurylys jumysy aıaqtalǵan. Osynsha adam sondyqtan bosap qaldy. Biz olarǵa bos jumys oryndaryn usynamyz. Oǵan bolmasa, qoǵamdyq jumysqa kelisetinder bar. Bizdiń bazaǵa qansha adam jumystan qysqarǵany týraly málimet túsedi. Biraq sonyń kóbi kompanııaǵa enshiles kásiporyndarda basqa jumysqa qalady, — dedi basqarma basshysynyń orynbasary Janar Dáýletbaeva.

Jumystan bosatylǵandardyń 76,9%-y nemese 396-sy jumyspen qamtýdyń belsendi sharalarymen qamtylǵan. Osy jumystyń nátıjesinde aımaqtaǵy jumyssyzdyq deńgeıi 4,8%-dan 4,6%-ǵa tómendedi. Basqarma ókili muny respýblıkalyq kórsetkishpen birdeı dep otyr. Sondaı-aq bıylǵa josparlanǵan jumyspen qamtý baǵytyndaǵy kórsetkishter tolyǵymen oryndalatynyna sendirdi. 

Buǵan deıin biz Almatyda múgedektigi bar 1 620 adam jumyspen qamtý baǵdarlamalaryna qatysqanyn jazdyq.