Teńizden jumysshylardy tasymaldaıtyn avtobýsta áldebireý oq atqan

Atyraý oblysyndaǵy Teńiz ken ornynyń jumysshylaryn tasymaldaıtyn avtobýsta oq atqan adam ustaldy. Kúdikti qamaýǵa alyndy, dep habarlaıdy Kazinform.

Jylyoı aýdanyndaǵy «Teńiz» ken orny men Qulsary qalasy arasynda jumysshylardy tasymaldaıtyn avtobýsta oq atylǵan.

Atyraý oblystyq polıtsııa departamentiniń baspasóz qyzmeti rastaǵan aqparatqa qaraǵanda, oqıǵa 20 qarashada bolǵan.

Avtobýs salonynda otyrǵan jolaýshynyń biri Jańa Qaraton kentiniń tusyna kelgende oq atqan.

Saldarynan salondaǵy er adamnyń beti jaraqattanǵan.

«Salonda oq atqan adam ustalyp, qamaýǵa alyndy. Oǵan qatysty QR Qylmystyq kodeksiniń 293-babynyń 4-bóligimen tergeý júrgizilip jatyr», - dep habarlady departamenttiń baspasóz qyzmeti.

Eske sala ketelik, budan buryn Qulsary qalasyndaǵy jappaı tóbelesten soń 23 adam ustalǵanyn jazǵan bolatynbyz.

Jylyoı aýdanynyń ortalyǵy — Qulsary qalasynda jastar toptasyp tóbelesken. Jergilikti polıtseıler barlyq qatysýshy ustady.

Aýdandyq polıtsııa bólimine tóbeleske qatysy bar 23 adam jetkizildi. Onyń ishinde 8 jasóspirim bar.