Teńiz vahta qalashyǵyna 2,5 myńǵa jýyq qulsarylyq evakýatsııalanyp jatyr
ATYRAÝ. KAZINFORM – Atyraý oblysyndaǵy Qulsary qalasynan turǵyndardy Teńiz ken ornyndaǵy vahta kentine evakýatsııalap jatyr. Vahta qalashyǵynda 2,5 myńǵa jýyq tósek-oryn daıyndalǵan.
Atyraý oblystyq jedel shtabynyń málimetinshe, Qulsary qalasynyń turǵyndary Teńiz vahta kentine ishinara evakýatsııalanady.
Tasqyn sýǵa baılanysty osyndaı sheshim qabyldady.
«Jylyoı aýdanynda sý tasqynynyń qaýpine tónim, tótenshe jaǵdaı jarııalandy. Keshe dabyl júıesi qosyldy. Osyǵan oraı Teńiz vahta kentinde 2,5 myńǵa jýyq tósek-oryn daıyndaldy. Turǵyndar 35 avtobýspen qaýipsiz jerge kóshirilip jatyr», -dep habarlady oblystyq jedel shtabtan.
Búgin, 6 sáýir saǵat 00.30-daǵy jaǵdaı boıynsha Qulsary qalasynda shamamen 2480 turǵyn úı men ákimshilik ǵımaratty sý basqan.
Onyń 630-y – turǵyn úı. Alaıda, salynyp turǵan 100 úıge turǵyndar qonystanbaǵan.
«Aýdandaǵy 14 qabyldaý pýnktine 9484 adam evakýatsııalanady. Mektepterge kóshiriletin turǵyndardyń arasynda 4644 bala bar. Maıkómgen aýyl okrýginiń mádenıet úıi men mektepterine 415 adam evakýatsııalandy»,-dep málim etti jedel shtabtan.
Qazir Jylyoı aýdanynda tasqyn sýdan qorǵaý bóget salý, bekitý jumystary jalǵasyp jatyr.
Eske sala ketelik, buǵan deıin tasqyn sý Atyraý oblysyndaǵy Qulsary qalasyna kire bastaǵanyn jazǵan edik.
Qulsary qalasynda 2 500 úıdi tasqyn sý basyp, 4000 adam, onyń ishinde 1 myńnan astam bala kóshirildi.
Qulsaryda ákimdik, áleýmettik nysandar men ortalyq stadıon sý astynda qaldy.
Sondaı-aq, Qulsaryda ómirge kelgen egiz ul jáne aýrýhanada jatqan 77 naýqas Mańǵystaý oblysy Beıneý aýdanynyń aýrýhanasyna evakýatsııalanyp jatyr.
