Teńiz tartylyp ketken: Aqtaý portynda kemeler men tankerlerdiń túbi tıip qalyp jatyr
AQTAÝ. KAZINFORM — Kaspıı teńiziniń tartylýy — Aqtaý halyqaralyq teńiz saýda portynyń jumysyna keri áserin tıgize bastaǵan. Qazirdiń ózinde júk kemeleri men munaı tankerlerine taýar 10 paıyzǵa deıin az júktelip jatyr. Óıtkeni, túbi tıip qalady.
Aqtaý halaqyaralyq teńiz saýda portynyń bólim bastyǵy Erbolat Tilepıevtiń aıtýynsha, qurǵaq júk kemesiniń júk kótergishi 6500 tonna bolsa, qazir 5500 tonnaǵa deıin júk tıelip jatyr. Tankerlerde de solaı. Bulaı jalǵasa berse, júktiń jartysyn ǵana júkteýge týra keledi.
— Tankerlerdiń júk kótergishi ártúrli. Mysaly 6800 tonna bolsa, 6500 tonnaǵa deıin tıelip jatyr. Al, 12 myń tonnalyqtarǵa 9-10 myń tonna júktelip jatyr. Eger tolyq kólemde tıese, asty tıip qalady. Osy jyldyń sońyna deıin tereńdetý jumystaryn júrgizbesek, eger teńizdiń deńgeıi odan ári túse berse, kememen tasymaldaý tıimsiz bolyp qalady, — deıdi Erbolat Tilepıev.
Aıta keteıik, Aqtaý porty arqyly Ázerbaıjan, Reseı, Iran men Túrikmenstan elderine munaı, astyq, metal, basqa da júkter men konteınerlik júkter tasymaldanady. Bıyl júk tasymaly ótken jyldyń osy kezeńimen salystyrǵanda 20 paıyzǵa ósken. Konteınerlik júkter — byltyr birinshi toqsanda 7 myńnan astam konteıner tasymaldansa, bıyl 17 myńnan kóp konteıner jóneltilip, kórsetkish — 134 paıyzdy quraǵan.
Qazaqstan Respýblıkasynyń Kólik mınıstri Marat Qarabaevtyń aıtýynsha, porttardyń áleýetin arttyrý basty nazarda. Sondyqtan máseleni sheshý úshin, port akvatorııasynda tereńdetý jumystary júrgiziledi. Byltyr Quryq portynda teńiz túbi tereńdetilgen. Aqtaý portynda da teńiz túbin 1,5 metrge deıin qazyp, tereńdigin 7,5 metrden asyrý kózdelgen. Al, alynǵan qum jaǵada jańa jer jasaýǵa qoldanylady.
— Tereńdetý jumystary mamyr aıynda bastalady dep josparlap otyrmyz. Onyń qarajatynyń bir bóligi QTJ-nyń esebinen, bir bóligi Úkimet tarapynan qosymsha berilip otyr. Jyldyń sońyna deıin jumystyń bir bóligin bitiremiz. Ekinshi kezeńin kelesi jyly jasaıtyn bolamyz. Bul jumystar kemelerge tolyq kólemde júk júkteýge múmkindik beredi. Al, qazylǵan jerden alynǵan qumdy jaǵadaǵy sýy taıyz jerge tógip, bıiktigi 2 metrlik jer jasalady. Sonyń arqasynda 171 gektar jańa jer telimi paıda bolady. Onda termınal salý josparda, — deıdi kólik mınıstri.
Buǵan deıin, Mańǵystaýda 460 oqýshy ýlanǵan mektep ashanasynyń meńgerýshisi 1 jylǵa bas bostadyǵynan aırylǵany týraly jazǵan bolatynbyz
Aıagóz Іzbasarova