Teńiz shebin qorǵaý: Otandyq ofıtserler kúrdeli navıgatsııa ádisterin tájirıbede qoldandy
ASTANA. KAZINFORM – Áskerı teńizshiler Kaspıı teńiziniń ortalyq bóliginde kemelerdi basqarý jáne teńizde júzý qaýipsizdigin qamtamasyz etýge baılanysty oqý-jaýyngerlik mindetter keshenin oryndady.
Joryqqa qatysýshylar vahtalyq aýysymdar quramynda áreket etip, shtýrmandyq vahtany óz betinshe atqarý daǵdylaryn jetildirdi.
– Іs-sharalar kásibı sheberlikti, keme júrgizý daǵdylaryn jáne shtýrmandyq qyzmetti uıymdastyrý deńgeıin arttyrýǵa baǵyttaldy. Mamandar vahtalyq ofıtser retinde is-qımyldardy pysyqtap, shtýrmandyq vahtany atqarýǵa daıyndyqtan ótti, - dep naqtylady «Oral» zymyran-artıllerııalyq kemesiniń shtýrmandyq jaýyngerlik bóliminiń komandıri aǵa leıtenant Asylbek Orazbaev.
Teńiz aımaǵynyń ereksheligin zerdeleýge, navıgatsııa ádisterin tájirıbede qoldanýǵa, baǵytty belgileý men qalyptasqan jaǵdaıǵa qaraı kemeniń baǵytyn túzetý daǵdylaryn jetildirýge erekshe nazar aýdaryldy.
Tájirıbelik daıyndyq qyzmettik-jaýyngerlik jaǵdaılarǵa barynsha jaqyn ortada ótkizildi. Bul áskerı qyzmetshilerge shtýrmandyq qyzmetti uıymdastyrýda qosymsha tájirıbe jınaqtaýǵa, jaǵdaıdy jedel baǵalaýǵa jáne durys sheshim qabyldaý qabiletterin nyǵaıtýǵa múmkindik berdi.
Shtýrmandyq joryq aıaqtalǵannan keıin ofıtserler daıarlyqtyń negizgi baǵyttary boıynsha synaq tapsyryp, joǵary deńgeıdegi bilimderi men praktıkalyq daǵdylaryn kórsetti.
Shtýrmandyq daıarlyq áskerı-teńiz mamandarynyń jaýyngerlik mashyǵynyń negizgi elementteriniń biri sanalady. Ol jeke quramnyń joǵary jaýyngerlik ázirligin saqtap, teńiz shebin qorǵaý mindetterin tıimdi oryndaýǵa jáne Áskerı-teńiz kúshteriniń jaýyngerlik áleýetin arttyrýǵa septigin tıgizedi.
Eske salsaq, buǵan deıin 500-den astam teńiz jaıaý áskeri tank synaǵy daıarlyǵynan ótkenin jazǵan edik.
