«Teńiz-Novorossıısk» qubyrymen munaı tasymaldaý úsh kúnge nege toqtatyldy

Kaspıı qubyr konsortsıýmynyń «Teńiz-Novorossıısk» qubyrymen «qara altyndy» tasymaldaý, Qara teńiz jaǵalaýyndaǵy termınalynda tankerlerge munaıdy tıeý birneshe kúnge toqtatylǵan bolatyn. Búgin munaıdy tıeý, jóneltý qaıta jalǵasqan, dep habarlaıdy Kazinform.

Tankerlerge munaı tıeýdi toqtatýǵa qolaısyz aýa raıy sebep bolǵan. Konsortsıýmnyń Telegram arnasyndaǵy aqparatqa súıensek, 22-26 jeltoqsan aralyǵynda Qara teńizde qatty jeldiń saldarynan tolqyn kóterilgen. Soǵan baılanysty termınalda tankerlerge munaıdy aýystyryp tıeý tolyǵymen toqtatylǵan.

Al, tankerler kútý aımaǵyna jiberilgen.

«25-28 jeltoqsan aralyǵynda munaıdy saqtaıtyn qoımalardyń tolǵanyna baılanysty «Teńiz-Novorossıısk» qubyrymen tasymaldaý toqtatyldy. Termınalda qalyptasqan jaǵdaı týraly júk jóneltýshilerge ýaqytyly habarlandy. Júk jóneltýshilerdiń munaıy qubyrdyń jelilik bóliginde jáne teńiz termınalynyń rezervýarlyq parkindegi bos qazandarǵa quıyldy. Al, 26-27 jeltoqsanda aýa raıynyń jaqsarǵan sátinde teńiz termınalyndaǵy aılaq qurylǵylarynda tankerlerge munaıdy aýystyryp tıeý qaıta bastaldy», - dep habarlady konsortsıýmnyń baspasóz qyzmeti.

Sol kúnderi jalpy dedveıti 218 myń tonnany quraıtyn eki tanker jóneltilgen. Búgin, 28 jeltoqsanda munaıdy tıeý, jóneltý jumysy qaıta jalǵasty. Qazir Kaspıı qubyr konsortsıýmynyń munaı qubyry jelisi shtattyq rejımde jumys istep tur.

Eske sala ketelik, buǵan deıin Kaspıı qubyr konsortsıýmynyń teńiz termınalynda tankerlerge munaı tıeý qaıta bastalǵanyn jazǵan bolatynbyz.