«Teńiz» munaı ken ornyndaǵy «QazMunaıGaz» úlesiniń artqanyn qalaımyz – Ashat Hasenov

ASTANA. KAZINFORM – «QazMunaıGaz» dáleldenbegen munaı qory 800 mln tonna bolatyn ken oryndaryn zerttep jatyr. Bul týraly Jibek Joly telearnasynyń «Ýáde» baǵdarlamasyna eksklıýzıvti suhbat bergen «QazMunaıGaz» UK» AQ basqarma tóraǵasy Ashat Hasenov aıtty.

- «QazMunaıgaz» kompanııasy jasap jatqan jumystardyń ereksheligi – tereń shógindi jynystardy zertteýge jáne burǵylaýǵa barýy. Muny kez kelgen mekeme jasaı almaıdy. Sebebi, oǵan eń aldymen qarajat kerek. Máselen, Qyzylorda oblysyndaǵy Torǵaı paleozoı jobamyzda 5 500 metrlik tereńdikte burǵylap jatyrmyz. Munan bólek, Atyraýdaǵy Qaraton tuzasty ýchaskesinde burǵylaý jumystaryn bastady. Ol da 5 500 metr tereńdikte júrgiziledi. ıAǵnı, ulttyq kompanııanyń qazirgi ýaqytta bet burǵan baǵyty – tereń jynystardy, tereń qabattardy geologııalyq turǵyda zertteý, - dedi Ashat Hasenov.

Onyń atap ótýinshe, ulttyq kompanııaǵa elimizde 1 jylda óndiriletin munaı kóleminiń 26 paıyzy tıesili. Qalǵany jeke kompanııalardyń úlesinde.

- Ulttyq kompanııaǵa qajetti eń basty dúnıe – qoryn ulǵaıtý. Osy baǵytta byltyr da, bıyl da burǵylaý jumystaryn júrgizip jatyrmyz. Búginde Atyraý, Qyzylorda, Aqtóbe, Mańǵystaý óńirlerinde geologııalyq barlaý turǵysynan burǵylaý jumysyn bastadyq. Bul jumys toqtamaıdy. Qazirgi ýaqytta olar ken orny dep aıtylmaıdy. Sebebi munaıdyń bar-joǵy dáleldenbegen. Dál qazir áli dáleldenbegen 800 mln tonna munaı qory boıynsha zertteý jumystaryn júrgizip jatyr, - dedi ol.

Osy oraıda Ashat Hasenov «QazMunaıGazdyń» «Teńiz» munaı ken ornyndaǵy úlesi 20 paıyzdy quraıtynyn, bul úlesti ulǵaıtý máselesi jan-jaqty pysyqtalýy tıistigin aıtady.

- Árıne, ulttyq kompanııa retinde bul úlestiń ulǵaıǵanyn qalaımyz, - dedi «QazMunaıGaz» basshysy.

Qazaqstannyń dáleldenbegen munaı qorynyń kólemi qansha ekenin jazǵan bolatynbyz.