«Teńiz» kenishindegi vahtalyq qalashyqqa 6,5 myńnan astam adam evakýatsııalandy
ATYRAÝ. KAZINFORM – Atyraý oblysyndaǵy Qulsary qalasynan eki kúnde «Teńiz» ken ornyndaǵy vahtalyq qalashyqqa 6,5 myńnan asqan adam evakýatsııalandy.
Qulsary qalasynyń turǵyndary «Teńizdegi» qalashyqqa kún saıyn evakýatsııalanyp jatyr. Olardyń basym kópshiligi – balaly áıelder men qarttar.
Turǵyndar ystyq tamaq, medıtsınalyq kómekpen qamtamasyz etilgen. Balalarǵa oıynshyqtar men boıaýlar taratylǵan.
«Biz ózimizdi úıdegideı sezinip júrmiz. Ashanadaǵy tamaq dámi unady. Meıramhanadaǵy tamaqtardy tańdaýǵa bolady. Balalar dalada oınaýǵa shyqsa, olardy qalashyqtyń kúzet qyzmetkerleri qadaǵalaıdy», -deıdi Maqpal Shaharbaeva.
Onyń aıtýynsha, turǵyndar túngi mezgilde «Teńizdegi» qalashyqqa evakýatsııalanǵan.
Al, áleýmettik jelide kúzetshiniń kishkentaı balanyń artynan júgirip bara jatqany túsirilgen sýret tarady. Jeli qoldanýshylary sýretke baılanysty jyly pikir bildirip jatyr.
Eske sala ketelik, budan buryn Atyraýdaǵy Qulsary qalasynan 12 myńnan astam adam evakýatsııalandy.
Sondaı-aq, Atyraý oblysynda evakýatsııalaý úshin 15 myń oryn daıyndalǵanyn jazǵan edik.
Tasqyn sý qaýpi Qulsary qalasynyń 7 shaǵyn aýdanyna tónip turǵanyn habarlaǵan bolatynbyz.
