Teńiz ken ornyndaǵy qondyrǵylardyń birinde órt boldy
ATYRAÝ. KAZINFORM – 11 naýryz kúni keshkilik ýaqytta Teńiz ken ornyndaǵy úshinshi býyn zaýytynda órt tirkeldi. Qondyrǵylardyń biri órtengen. Alaıda qyzyl jalyn kóp ótpeı sóndirildi.
Oqys oqıǵany kompanııanyń baspasóz qyzmeti rastady.
– «Teńizshevroıl» Teńizdegi óz nysandarynyń birinde oqıǵa bolǵanyn rastaıdy. Zardap shekkender joq, kompanııa belgilengen tártipke sáıkes oqıǵanyń túpki sebepterin anyqtaý jumystaryn júrgizip jatyr. Budan bólek, TShO óz qyzmetiniń naqty egjeı-tegjeılerine túsinikteme bermeıdi, - dep málimdedi kásiporynnyń baspasóz qyzmeti.
Eske salaıyq, qańtarda Teńiz ken ornyndaǵy elektr generatorlarynda órt bolǵan edi. Tótenshe jaǵdaı Teńiz ken ornyndaǵy Úshinshi býyn zaýytynyń aýmaǵynda tirkelgen.
Keıin «Teńizshevroıl» kompanııasy saqtyq sharasy retinde Teńiz jáne Korolev ken oryndaryndaǵy óndiristi ýaqytsha toqtatqanyn rastady.
Munan soń kásiporyn elektr energııasyn taratý júıesi qaýipsiz túrde iske qosylǵanyn jáne shıki munaıdyń bastapqy óndirý jumystary qaıta bastalǵanyn málimdedi.
Kúni keshe Energetıka mınıstri Erlan Aqkenjenov Teńiz ken ornynda munaı óndirý qalpyna keltirilgenin, táýligine 120 myń tonnaǵa deıin qara altyn óndirilip jatqanyn aıtty.