Teńiz ken ornyndaǵy apattan qansha shyǵyn keldi

ASTANA. KAZINFORM – Energetıka mınıstri Erlan Aqkenjenov Teńiz ken ornynda órttiń saldary jaıynda túsinik berdi.

Búgin Parlament Májilisindegi baspasóz máslıhatynda Teńiz jáne Korolev ken oryndaryndaǵy óndiristi ýaqytsha toqtatý qalaı áser etkeni surady. 

- Eger kólemi jaıynda aıtsaq, shamamen 900 myń tonna óndirilmeı qaldy. Atap aıtqanda, Korolev ken ornyn qaıta iske qostyq, Teńiz josparly túrde jumysyn bastap jatyr... Jalpy, aqshalaı shyǵyndardy ártúrli tásilmen esepteýge bolady. Esepteý mehanızmi kúrdeli, ıaǵnı roıaltı, salyq, respýblıkanyń úlesi bar. Sondyqtan, barlyq jóndeý jumysyn aıaqtap, kelgen shyǵynnyń tolyq kólemin anyqtaǵannan keıin, barlyq málimetti jarııalaımyz, - dedi E. Aqkenjenov.

Onyń aıtýynsha, qazirgi shyǵyndy nemese qalyp qoıǵan óndiris kóleminiń ornyn toltyrý múmkindigi bar. 

- Keshe Chevron korporatsııasynyń basshylyǵymen kezdestim, onyń aldynda «Teńizshevroılmen» kelissóz júrgizdim. Olar bul kólemdi eńserýge ýáde berdi. Sondyqtan, jyl nátıjesi boıynsha Qazaqstan eshteńe joǵaltpaıdy dep oılaımyn, - dedi ol.

Budan buryn habarlanǵandaı, 18 qańtarda Teńiz ken ornynda órt bolyp, 450-den asa jumysshy evakýatsııalanǵan edi.

Al bir kúnnen keıin TShO Teńiz jáne Korolev ken oryndaryndaǵy óndiristi ýaqytsha toqtatqanyn habarlaǵan edi. 

26 qańtarda Teńiz ken ornynda munaı óndirý qaıta jandanǵany habarlandy.