Teńiz ken ornyndaǵy apat: Oljas Bektenov ExxonMobil kompanııasymen kelissóz júrgizdi
ASTANA.KAZINFORM - Premer-mınıstr Oljas Bektenov ExxonMobil kompanııasynyń aǵa vıtse-prezıdenti Pıter Lardenmen munaı-gaz salasyndaǵy yntymaqtastyq máseleleri boıynsha kezdesý ótkizdi. Teńiz, Qashaǵan jáne Kaspıı qubyr konsortsıýmy syndy birlesken jobalaryna qatysty birqatar másele talqylandy. Bul týraly Úkimettiń baspasóz qyzmeti habarlady.
Premer-mınıstr Teńiz jaǵdaıyna baılanysty alańdaýshylyq bildirdi. Qysqa merzimde apat saldaryn jedel joıý jáne bolashaqta osyndaı oqıǵalardyń aldyn alý úshin qajetti sharalardy qabyldaý boıynsha jedeldetilgen jumystyń mańyzdylyǵy atap ótildi.
Taraptar sondaı-aq Kaspıı qubyr konsortsıýmy tóńiregindegi jaǵdaıdy talqylady. Olar mańyzdy ınfraqurylymdyq nysannyń turaqty jumys isteýine ortaq qyzyǵýshylyq tanytty.
Sonymen qatar kezdesý barysynda kómirsýtek ken oryndaryn ıgerý tıimdiligin odan ári arttyrý sharalary qaraldy. Geologııalyq barlaýdy damytý máselelerine erekshe nazar aýdaryldy. Bul baǵyttar Memleket basshysy Qasym-Jomart Toqaevtyń Ulttyq quryltaıdyń V otyrysynda qoıǵan mindetterine jaýap beredi.
Kezdesýge qatysýshylar osy jylǵa arnalǵan óndiristik josparlarǵa da nazar aýdardy. 2025 jyly Keleshekte keńeıtý jobasynyń aıaqtalýyna baılanysty Teńiz kenishinde munaı óndirý 39 mln tonnadan astam, Qashaǵanda 18 mln-nan astam tonna boldy. Kaspıı qubyr konsortsıýmy arqyly energııa resýrstaryn jóneltýdiń jalpy kólemi 70,5 mln tonnaǵa jetti, onyń ishinde qazaqstandyq munaı – 63,8 mln tonna.
Aıta keteıik, 18 qańtarda Teńiz ken ornynda órt bolyp, 450-den asa jumysshy evakýatsııalandy.
Al bir kúnnen keıin TShO Teńiz jáne Korolev ken oryndaryndaǵy óndiristi ýaqytsha toqtatqanyn habarlaǵan edi.
Teńiz ken ornynda bolǵan jaǵdaıdan keıin gaz zaýyttyń qoldanysyndaǵy fakelde jaǵylǵan. Bul týraly Atyraý oblysy boıynsha Ekologııa departamenti basshysynyń orynbasary Erlan Esenov málimdedi.
Qazaqstan men ExxonMobil munaı-gaz jobalary boıynsha ózara is-qımyldy kúsheıtedi.