Teńiz ken ornynda jer silkindi

ATYRAÝ. KAZINFORM – Búgin Atyraý oblysyndaǵy «Teńiz» ken ornynda jerasty dúmpýi bolǵany jóninde aqparat tarady.

Keıbir BAQ pen telegram arnalaryndaǵy aqparatqa qaraǵanda, jer silkinisi búgin, 11 mamyrda saǵat 11:44 shamasynda bolǵan. 

Jerasty dúmpýiniń tereńdigi – 10 metr, al, magnıtýdasy – 4,2. Teńiz» ken ornyndaǵy jer silkinisi 5 sekýndqa sozylǵan. 

«Teńizshevroıl» kompanııasynyń baspasóz qyzmeti jer silkinisi bolǵanyn rastady. 

– «Teńizshevroıl» 2025 jylǵy 11 mamyrda «Teńiz» ken ornynda seısmıkalyq oqıǵanyń tirkelgenin rastaıdy. Bul oqıǵa personal men óndiris qyzmetine áser etken joq, - dep málim etti kompanııanyń baspasóz qyzmeti.

«Teńiz» – Atyraý oblysynyń Jylyoı aýdanynda ornalasqan iri ken orny. Munda 1976 jyly 24 maýsymda №1 uńǵymany burǵylaýdy bastalǵan. Úsh jyldan soń ken ornyna synaq júrgizilgen. 

1979 jylǵy 18 jeltoqsanda ken ornyndaǵy tuzasty qabatynan táýligine 475-600 tekshe metr munaı alynatyny jóninde qorytyndy jasalǵan. Ken ornynyń kollektoryndaǵy kúkirt mólsheriniń 25 paıyzǵa jetetini anyqtalǵan. 

Qazir ken ornyn «Teńizshevroıl» kompanııasy ıgeredi. Bul kompanııa 1993 jylǵy 6 sáýirde qurylǵan. 

Eske sala ketelik, budan buryn Atyraý oblysynda Qulsarydan 120 shaqyrym qashyqtyqta jer silkingenin habarlaǵan bolatynbyz.