Teńiz ken ornynda táýligine 1 mln barrel munaı óndiriledi
ASTANA. KAZINFORM — QR Premer-mınıstriniń birinshi orynbasary Nurlybek Nálibaev Atyraý oblysyna jumys sapary barysynda óńirdegi birqatar strategııalyq mańyzdy óndiristik nysandy aralap, «Qashaǵan» ken ornyna áýeden sholý jasap, Teńiz ken ornyndaǵy, «Kazakhstan Petrochemical Industries Inc.» (KPI) zaýytyndaǵy jáne «Sılleno» polıetılen óndirý zaýytynyń qurylys alańyndaǵy jumystarmen tanysty. Bul týraly Úkimet málim etti.
Jumys sapary aıasynda Nurlybek Nálibaev «Qashaǵan» ken ornyna áýeden sholý jasady. Qashaǵan ken ornynda jylyna 1 mlrd tekshe metr gaz óńdeýge arnalǵan gaz óńdeý zaýytyn salý jobasy júzege asyrylý satysynda. Búgingi tańda joba boıynsha jalpy oryndalý deńgeıi 60,78%-dy quraıdy, onyń ishinde qurylys-montaj jumystarynyń oryndalýy 37,50%-ǵa jetti. Negizgi jabdyqtardy jetkizý jumystary 98%-ǵa aıaqtaldy. Qurylys alańynda qazirgi ýaqytta 1500-den astam jumysshy men 350 birlik arnaıy tehnıka jumyldyrylǵan, sondaı-aq túngi aýysymdaǵy jumys uıymdastyrylǵan.
— Teńiz ken ornynda Premer-mınıstrdiń birinshi orynbasaryna «Teńizshevroıl» JShS qyzmetiniń nátıjeleri jóninde baıandaldy. Úshinshi býyn zaýyty iske qosylǵaly ken ornyndaǵy táýliktik munaı óndirý kólemi 1 mln barrelge jetti. Kompanııa 2025 jyly shamamen 1,3 mln tonna suıytylǵan gaz jáne 2,5 mln tonnaǵa jýyq kúkirt ótkizgen, — delingen habarlamada.
Nurlybek Nálibaev kásiporynnyń óndiristik kórsetkishterin joǵary baǵalap, «Teńizshevroıl» JShS kóp jyl boıyna Qazaqstannyń munaı-gaz salasyndaǵy negizgi kompanııalardyń biri retinde ulttyq ekonomıkanyń damýyna eleýli úles qosyp kele jatqanyn atap ótti. Kezdesýde ónerkásiptegi qaýipsizdik, otandyq mamandardy daıarlaý jáne qazaqstandyq kompanııalardy iri jobalarǵa qatystyrý aýqymyn keńeıtý máselelerine de aıryqsha nazar aýdaryldy. QR Premer-mınıstriniń birinshi orynbasary «Teńizshevroıl» JShS basshylyǵyna korporatıvtik áleýmettik jaýapkershilik baǵdarlamalary aıasynda 12 myń oryndyq stadıon salý jobasyn júzege asyrýǵa qatysý múmkindigin qarastyrýdy tapsyrdy.
Jumys saparyndaǵy kelesi nysan retinde belgilengen «Kazakhstan Petrochemical Industries Inc.» (KPI) zaýytynda Nurlybek Nálibaevqa kásiporynnyń jumys nátıjeleri men damý jospary tanystyryldy.
Eldegi iri ındýstrııalyq jobalardyń biri sanalatyn keshen Qazaqstanda óńdeý ónerkásibin damytýda mańyzdy ról atqarady. Zaýyt iske qosylǵaly beri polıpropılen óndirisiniń kólemin kezeń-kezeńimen arttyryp keledi. Eger 2022 jyly 32 myń tonna ónim shyǵarylsa, 2023 jylǵy kórsetkish 181,1 myń tonnaǵa, 2024 jyly 248,7 myń tonnaǵa jetip, 2025 jyldyń qorytyndysy boıynsha 375 myń tonna bolǵan. 2026 jyly óndiris kólemin 450 myń tonnaǵa deıin jetkizý josparlanyp otyr. Kezdesýde tehnologııalyq protsesterdiń senimdiligin arttyrý, shyǵarylatyn ónim túrlerin kóbeıtý jáne munaı-gaz hımııasyn odan ári damytý jónindegi sharalar usynyldy.
Nurlybek Nálibaev jyldyq qýattylyǵy 1,25 mln tonna «Sılleno» polıetılen shyǵarý zaýytynyń qurylys alańynda da boldy. Kásiporyn Memleket basshysynyń tapsyrmasy boıynsha munaı-gaz hımııasy klasterin qalyptastyrý sheńberinde salynýda.
«Sılleno» JShS bas dırektory Muhtar Avýtbaev jobanyń júzege asyrylý barysy, qurylys-montaj jumystarynyń qazirgi jaǵdaıy men aldaǵy kezeńderi týraly málimet berdi. Zaýyttyń iske qosylýy suranysqa ıe polımer ónimderdiń ımportyn almastyrýǵa, qosylǵan quny joǵary taýarlardyń eksportyn arttyrýǵa jáne jańa jumys oryndaryn ashýǵa múmkindik beretini aıtyldy.
Nurlybek Nálibaev saparyn qorytyndylap, munaı-gaz jáne munaı hımııasy jobalaryn júzege asyrýdyń el ekonomıkasyn ártaraptandyrý, elimizdiń ónerkásiptik áleýetin ósirý jáne Qazaqstannyń álemdik naryqtaǵy básekege qabilettiligin arttyrý jolyndaǵy strategııalyq mańyzy zor ekenin basa aıtty.
Eske sala keteıik, buǵan deıin Nurlybek Nálibaev BQO-da Qarashyǵanaq ken orny men kommýnaldyq ınfraqurylym jobalarymen tanysqan bolatyn.
