Teńiz ken ornynda órt bolyp, 450-den asa jumysshy evakýatsııalandy
ATYRAÝ. KAZINFORM – Teńiz ken ornyndaǵy elektr generatorlarynda eki órt boldy. Bul aqparatty «Teńizshevroıl» JShS baspasóz qyzmeti rastady.
Naqtyraq aıtqanda, tótenshe jaǵdaı Teńiz ken ornyndaǵy Úshinshi býyn zaýytynyń aýmaǵynda tirkelgen.
– Órt jedel sóndirildi. Zardap shekkender joq. TShO-nyń óndiristik qyzmeti toqtaýsyz, qalypty rejımde jalǵasyp jatyr. Qyzmetkerlerdiń qaýipsizdigi TShO úshin basty basymdyq bolyp qala beredi. Kompanııa oqıǵanyń túpki sebepterin belgilengen tártipke sáıkes anyqtap jatyr. Budan basqa, TShO óz operatsııalyq qyzmetiniń jekelegen máseleleri boıynsha pikir bildirmeıdi, - dep málimdedi TShO.
Jalpy evakýatsııalanǵan jumysshylardyń sany 450-den asady.
Osy jaǵdaıǵa baılanysty Qazmunaıgaz kompanııasynyń taratqan aqparatyna súıensek, aldymen ken ornyndaǵy GTES-4 nysanynda GT-9.3 týrbınasynyń transformatory, keıin GTES-4 nysanyndaǵy GT-9.5 transformatory qyzyl jalynǵa oranǵan.
Osyǵan deıin, Astanada 14 qabatty turǵyn úıden órt shyqqanyn habarlaǵan edik.
