«Teńiz» ken ornynda óndirilgen munaı men gaz kólemi azaıǵan
ATYRAÝ. KAZINFORM – Atyraý oblysyndaǵy «Teńiz» ken ornynda 6 aıda munaı óndirý 3,7%-ǵa azaıǵan. Bul ken ornynan óndirilgen ilespe gaz kólemi 4,2%-ǵa tómendegen.
«QazMunaıGaz» AQ baspasóz qyzmetiniń málimetinshe, elimizde munaı jáne gaz kondensatyn óndirý kólemi 1,1%-ǵa artyp, 11 mln 989 myń tonnany quraǵan.
«Al «Teńiz» ken ornynda munaı óndirý 3,7%-ǵa azaıyp, 2 mln 872 myń tonnany qurady. Bul – táýligine 126 myń barrel. Bul rette ilespe gaz óndirý kólemi 4,2%-ǵa tómendep, 1 mlrd 587 mln tekshe metrdi qurady. Kórsetkishterdiń tómendeýi bıyl jyldyń mamyr aıynda shıki gaz aıdaý obektilerinde kúrdeli jóndeý júrgizýge baılanysty boldy», - dep habarlady kompanııanyń baspasóz qyzmeti.
«Teńiz» ken ornynda bıylǵy sáýirde uńǵy erneýindegi qysymdy basqarý jobasynyń nysandaryn paıdalanýǵa berý boıynsha jumystar bastalǵan. Jańartylǵan kestege sáıkes keleshek keńeıtý jobasyn iske qosý 2025 jyldyń ekinshi toqsanyna josparlanyp otyr.
«Teńizshevroıl» kompanııasy baspasóz qyzmetiniń deregine qaraǵanda, seriktester 2016 jyly bul jobany isk asyrý jóninde 2016 jyly sheshim qabyldaǵan.
«Keleshek keńeıý jáne uńǵy erneýindegi qysymdy basqarý jobasy munaı óndirý kólemin jylyna shamamen 12 mıllıon tonnaǵa arttyrady. Sol kezde táýligine 260 myń barrelge deıin munaı óndiriledi. Munaı óndirýdiń jalpy kólemi jylyna shamamen 39 mıllıon tonnaǵa jetedi. Bule táýligine 850 myń barreldi quraıdy», - dep málim etti kompanııanyń baspasóz qyzmetinen.
Eske sala ketelik, budan buryn Kaspıı qubyr konsortsıýmy «Teńiz» kenishinen 16 mln tonna munaı tasymaldaǵanyn habarlaǵan edik.
