Teńiz ken ornynda munaı óndirý kólemi ýaqytsha tómendedi – Energetıka mınıstrligi
ASTANA.KAZINFORM - Energetıka mınıstrligi Teńiz ken ornyndaǵy jaǵdaıǵa qatysty túsinikteme berdi.
- 2026 jyldyń 28 mamyrynda «Teńizshevroıl» JShS óndiristik nysandarynyń birinde óndiristik aqaý boldy. Bul munaı óndirýdi ýaqytsha tómendetýge ákeldi. Qazir kompanııa qajetti óndiristik sharalardy qabyldap jatyr. Al ken ornyndaǵy óndiris qalpyna keltirý kezeńinde. Qyzmetkerlerge, qoǵamǵa nemese qorshaǵan ortaǵa eshqandaı qaýip tóngen joq, - dedi QR Energetıka mınıstri keńesshisi jáne resmı ókil Ásel Serikpaeva.
Onyń aıtýynsha, jaǵdaı Energetıka mınıstrliginiń turaqty baqylaýynda.
Eske sala keteıik, qańtar aıynda Teńizde elektr generatorlaryna qatysty eki órt tirkeldi. Órt tez arada sóndirildi, eshkim zardap shekken joq.
«Teńizshevroıl» JShS-degi apattan soń propılen óndirisi toqtady.
