Teńiz ken ornynda munaı óndirý qaıta jandandy

ASTANA. KAZINFORM – QR Energetıka mınıstrligi Teńiz ken ornynda óndiristik operatsııalardyń qaıta bastalǵanyn habarlady.

Jedel shtabtyń málimetine sáıkes, búgin saǵat 03:35-te alǵashqy uńǵyma sátti iske qosyldy. Tehnologııalyq qondyrǵylar iske qosylyp, shtattyq rejımde jumys istep jatyr.

Qazirgi ýaqytta 5 uńǵyma paıdalanýǵa berildi. «Teńizshevroıl» kompanııasynyń tehnıkalyq qyzmetteri kelesi toptyq ólsheý qondyrǵysyn iske qosýǵa daıyndyq jumystaryn júrgizip jatyr. Munaı óndirý kólemin arttyrý júıe parametrleri turaqtandyrylyp, óndiristik protsesterdiń tolyq qaýipsizdigi qamtamasyz etilýine qaraı kezeń-kezeńimen júzege asyrylady.

Buǵan deıin, 26 qańtarda, Ekinshi býyn zaýyty sátti iske qosylǵan bolatyn. Onyń jumysy qazirgi ýaqytta jumys istep turǵan Korolev ken ornynan jetkiziletin shıkizatpen qamtamasyz etilip jatyr.

QR Energetıka mınıstrligi men «QazMunaıGaz» UK» AQ jobanyń josparly qýattylyqqa qysqa merzimde shyǵýyn qamtamasyz etý maqsatynda operatorǵa jan-jaqty qoldaý kórsetip jatyr.

- Qalpyna keltirý jumystaryn úılestirý úshin óndiristik nysandarda tikeleı Energetıka vıtse-mınıstri Qaıyrhan Tutqyshbaev jumys júrgizip jatyr. Jaǵdaı turaqty baqylaýda, basty basymdyq – ónerkásiptik qaýipsizdiktiń qatań talaptaryn saqtaý, - delingen habarlamada.

«Teńizshevroıl» JShS-degi apattan soń propılen óndirisi toqtaǵanyn jazǵan bolatynbyz.

Teńiz ken ornynda janyp ketken transformatorlar jóndelip, munaı óndirý bir apta ishinde qalpyna keltiriletini týraly Energetıka mınıstri Erlan Aqkenjenov aıtqan bolatyn.