«Teńiz» ken ornynda kúkirtten ýlanǵan 2 adamnyń bireýi aýrýhanada jatyr

ATYRAÝ. KAZINFORM — Atyraý oblysyndaǵy «Teńiz» ken ornynda kúkirtten ýlanǵan 2 adam aýrýhanaǵa jetkizildi. Onyń bireýi aýrýhanada jatyr. Al ekinshisi emdeý ornyna jatýdan bas tartqan.

Bul derekti Atyraý oblystyq densaýlyq saqtaý basqarmasynyń baspasóz qyzmeti rastady. 

— 8 naýryzda «Teńiz» ken ornynda kúkirtti zattardan ýlaný belgilerimen eki azamat medıtsınalyq kómekke júgindi. Medıtsınalyq tekserý nátıjesine sáıkes bir naýqastyń jaǵdaıy turaqty boldy. Ol óz erkimen aýrýhanaǵa jatýdan bas tartty. Sol sebepten turǵylyqty mekenjaıy boıynsha ambýlatorııalyq baqylaýǵa jiberildi. Al ekinshi naýqas oblystyq aýrýhananyń toksıkologııa bólimine jatqyzyldy. Qazir naýqas qajetti em-dom qabyldap jatyr. Dárigerler naýqastyń jaǵdaıyn turaqty dep baǵalady. Oblystyq densaýlyq saqtaý basqarmasy aýrýhanadaǵy naýqastyń jaǵdaıyn baqylaýda ustap otyr, - dep habarlady basqarmanyń baspasóz qyzmeti.

Kazinform tilishisi máseleniń mán-jaıyn bilý úshin «Teńiz» ken ornyn ıgerip jatqan «Teńizshevroıl» JShS-niń baspasóz qyzmetine habarlasqan edi. Alaıda kompanııanyń baspasóz qyzmeti atalǵan oqıǵaǵa baılanysty áli aqparat bermeı otyr. 

Eske sala ketelik, buǵan deıin Atyraýda Batys Prorva ken ornyndaǵy aqaýdy joıý kezinde 2 adam zaqym alǵanyn habarlaǵan bolatynbyz.