Teńiz ken ornynda qandaı jumys júrip jatyr
ATYRAÝ. KAZINFORM – Teńiz ken ornynda kompressor men tórt transformatordy paıdalana otyryp, qysymdy arttyrý júıeleri arqyly jumysty qaıta jandandyrý jumysy júrip jatyr. Bul jóninde Energetıka mınıstrligi habarlady.
Zaýyt jumysy Korolev ken ornynyń shıkizaty esebinen qamtamasyz etilip jatyr. Qazirgi ýaqytta shıkizat aǵyny táýligine 2 500 tonnany quraıdy. Mamandar júıeni toltyrý jáne jobalyq qýatqa shyǵý úshin mýltıfazalyq aǵyndy berý kólemin josparly túrde arttyrýda.
Teńiz ken ornynda barlyq kúsh pen tehnıkalyq resýrs tolyq jumyldyryldy. Resmı aqparatqa sáıkes, nysanda qorytyndy tehnıkalyq synaqtar ótkizý úshin barlyq qajetti personal jumyldyrylǵan. Qazirgi tańda energııamen jabdyqtaý júıesiniń qaýipsiz iske qosylýy rastaldy. Mınıstrlik tarapynan «Teńizshevroıl» kompanııasyna ónerkásiptik qaýipsizdik pen eńbekti qorǵaý (HSE) talaptaryn qatań saqtaı otyryp, óndiristi barynsha jedel qalpyna keltirý mindeti júkteldi.
– Ekinshi býyn zaýytynyń sátti iske qosylýyna arnaıy tehnologııalyq ótpeli jeli montajynyń jedel aıaqtalýy septigin tıgizdi. Kesteniń kelesi mańyzdy kezeńi – 2 aqpan. Bul kúnge qaraı kompressor men tórt transformatordy paıdalana otyryp, Qysymdy arttyrý júıeleri arqyly jumysty qaıta jandandyrý josparlanyp otyr. Bul tehnologııalyq jeliler kesheni men Ekinshi býyn zaýytyna shıkizatty tolyqqandy ári turaqty berýdi qamtamasyz etýge múmkindik beredi. Barlyq qalpyna keltirý jumysyn tikeleı Teńiz ken ornynda jedel baqylaý jáne úılestirý maqsatynda vedomstvo men ulttyq kompanııa basshylyǵy sol jerde turaqty túrde jumys isteýde, - dep málimdedi mınıstrlik.
Óndiristik tsıkldi qalpyna keltirý máselesi Energetıka mınıstrligi basshylyǵynyń erekshe ári turaqty baqylaýynda bolady. TShO kompanııasy senimdi óndiristik qyzmetti qamtamasyz etýge beıildiligin saqtaı otyryp, barlyq ınfraqurylymnyń daıyndyǵy men protsesterdiń qaýipsizdigi rastalǵan saıyn óndiris kólemin kezeń-kezeńimen arttyrady.
Osyǵan deıin QR Energetıka mınıstrligi Teńiz ken ornynda óndiristik operatsııalardyń qaıta bastalǵanyn málimdedi.
28 qańtarda Energetıka mınıstri Erlan Aqkenjenov Teńiz ken ornynda janyp ketken transformatorlar jóndelip, munaı óndirý bir apta ishinde qalpyna keltiriletini týraly aıtqan edi.