«Teńiz» ken ornynda dabyl júıesi qosylyp, qyzmetkerler evakýatsııalandy – «Teńizshevroıl»

ATYRAÝ. KAZINFORM – «Teńizshevroıl» kompanııasy Atyraý oblysyndaǵy «Teńiz» ken ornynda dabyl júıesi iske qosylǵanyn rastady.

Kompanııanyń baspasóz qyzmeti usynǵan aqparatqa qaraǵanda, oqıǵa 8 naýryzda bolǵan. 

— «Teńizshevroıl» (TShO) 2025 jylǵy 8 naýryzda «Teńizdegi» nysandarynyń birinde dabyl júıesiniń qosylýyna baılanysty barlyq qyzmetkerdiń qaýipsizdigin qamtamasyz etý úshin standartty hattamaǵa sáıkes evakýatsııa júrgizilgenin rastaıdy. Jumys ornynyń qaýipsiz ekendigi rastalǵannan keıin qyzmetkerler óz jumys oryndaryna oraldy. Bul oqıǵanyń áseri eki qyzmetkerge tıdi. Medıtsınalyq tekserýden keıin olardyń jaǵdaıy turaqtandy, — dep habarlady kompanııanyń baspasóz qyzmeti. 

Alaıda kompanııanyń baspasóz qyzmeti oqıǵanyń mán-jaıyn naqtylamady. Al telegram arnalardyń birinde habarlanǵandaı, separatordyń flanetsti qosylysynan quramynda kúkirtsýtegi bar gaz shyqqan. Sonyń saldarynan TShO-nyń merdiger kompanııasynyń 2 qyzmetkeri ýlanǵan. Olar aldymen ken ornyndaǵy klınakada tekserilip, keıin Atyraý qalasyndaǵy aýrýhanaǵa jetkizilgen. 

— Qazir TShO-nyń óndiristik qyzmeti úzdiksiz jalǵasyp jatyr, — dep málim etti kompanııanyń baspasóz qyzmetinen.

Eske sala ketelik, budan buryn «Teńiz» ken ornynda kúkirtten ýlanǵan 2 adamnyń bireýi aýrýhanada jatqanyn jazǵan edik.