Teńiz ken ornynda 6800-ge jýyq azamat daýys bere alady
ATYRAÝ. KAZINFORM– Teńiz ken ornynda jumys isteıtin qyzmetkerler Quryltaı depýtattarynyń saılaýyna qatysyp, daýys berýde. Ken ornynda júrgen 6800-ge jýyq qyzmetkerdiń saılaýǵa qatysýy kútilýde.
Daýys berýdi uıymdastyrý úshin alty lokatsııada segiz saılaý ýchaskesi jumys istep tur. «Teńizshevroıl» JShS baspasóz qyzmetiniń habarlaýynsha, qyzmetkerler jumys kestesine qaraı kúni boıy daýys bere alady.
Saılaý ýchaskelerine qatynaý úshin arnaıy kólik uıymdastyrylǵan. Avtobýstar óndiristik nysandar men daýys berý oryndary arasynda qatynap, qyzmetkerlerdi ýchaskelerge jetkizip, keıin jumys ornyna qaıta aparady.
— Búgin biz jumys aýysymyndamyz, sondyqtan turǵylyqty jerimiz boıynsha daýys bere almaımyz. Saılaý ýchaskeleriniń tikeleı Teńizde jumys istep turǵany jaqsy boldy. Sonyń arqasynda ken ornynan shyqpaı-aq daýys berýge qatysa alamyz, — dedi qyzmetker Ǵazızbek Erkin.
Al Sultan Tilekqabylov Teńiz ken orny aýmaǵynyń úlken ekenin aıtyp, arnaıy kóliktiń daýys berý protsesin jeńildetkenin atap ótti.
— Teńizdiń aýmaǵy úlken, kóptegen nysandar bir-birinen alys ornalasqan. Biz úshin arnaıy kólik uıymdastyryldy: saılaý ýchaskesine baryp, daýys berip, keıin jumys ornyna qaıta oralýǵa bolady, — dedi ol.
Saılaý ýchaskeleriniń jumysy ken ornyndaǵy aýysymdyq keste men óndiristik nysandardyń ornalasýyna sáıkes uıymdastyrylǵan.
Buǵan deıin Atyraýdaǵy oblystyq perzenthanada 100-ge jýyq ana daýys bergenin jazǵan edik.
