«Teńiz» ken ornynda 10 myń jumysshy 7 pýnktte óz tańdaýyn jasady
ATYRAÝ. KAZINFORM – Atyraý oblysyndaǵy «Teńiz» ken ornynda 10 myńǵa jýyq jumysshy jumys ornynda daýys berdi. Vahtalyq aýysymmen jumysta júrgender úshin ken ornynda 7 daýys berý pýnkti uıymdastyryldy.
Jylyoı aýdandyq aýmaqtyq referendým komıssııasynyń málimetinshe, búgin 10 referendým ýchaskesiniń músheleri daýys berý pýnktterine bıýlleten men arnaıy jáshik alyp keldi.
«Qazir «Teńiz» ken ornynda 10 myńǵa jýyq adam vahtalyq ádispen jumys isteıdi. Olardan referendýmda daýys berýge ótinish tústi. Ken ornyndaǵy jumys yrǵaǵyn toqtatpaý úshin 7 daýys berý pýnktin uıymdastyrý qolǵa alyndy. Bul jumys birneshe aptaǵa sozyldy. Daýys berýdiń úzdiksiz jáne qaýipsiz protsesin uıymdastyrý úshin barlyq qajetti shara qabyldandy», - dep habarlady aýdandyq aýmaqtyq komıssııadan.
Atyraý oblystyq aýmaqtyq referendým komıssııasynyń málimetinshe, munaı-gaz salasynyń vahtalyq aýysymdaǵy jumysshylary úshin daýys berý protsessi vahtalyq qalashyqtarda da uıymdastyrylǵan. Bul jumysty júzege asyrý 38 ýchaskelik komıssııaǵa júktelgen.
Eske sala ketelik, budan buryn Atyraý oblysyndaǵy munaıshylar jumys ornynda daýys berip jatqanyn habarlaǵan bolatynbyz.
