Teńiz ken ornyn keńeıtý jobasynyń quny 2,2 mlrd dollarǵa artýy múmkin
ASTANA. KAZINFORM – Energetıka mınıstrligi Teńiz ken ornyn keńeıtý jobasy bıýdjetiniń ulǵaıý sebebin túsindirdi.
«TShO Keleshekte keńeıtý jobasynyń – Uńǵyma erneýiniń qysymyn basqarý jobasyn iske asyrady. Joba aıasynda TShO óndirisi jylyna 12 mıllıon tonnaǵa artady. KKJ/UEQBJ jobasy (Keleshekte keńeıtý jobasynyń – Uńǵyma erneýiniń qysymyn basqarý jobasy) iske asyrýdyń sońǵy satysynda. Joba boıynsha naqty shyǵyndar $46 mlrd quraıdy, jumystyń jalpy ilgerileýi – 99,4 paıyz. Joba boıynsha negizgi qurylys jumystary 2023 jyly aıaqtaldy. Qazirgi ýaqytta júıelerdi (Systems Completion) aıaqtaý jáne iske qosý-baptaý jumystary júrgizilýde», - dep atap ótedi mınıstrlikten.
Vedomstvo málimetinshe, ótken jyldyń qyrkúıeginde TShO joba qunynyń josparlanyp otyrǵan jalpy ósýi jáne kesteniń aýysýy týraly atap ótken.
«Sodan keıin TShO seriktestermen birlesip, keste táýekelderin jáne joba qunyn baǵalaý boıynsha semınar (Cost and Schedule Risk Assessment) ótkizdi. Semınar nátıjeleri negizinde TShO seriktesterge $48,9 mlrd ($2,2 mlrd ulǵaıtý) mólsherindegi 2024 jyldyń 2 toqsanyna (2024 jyldyń jeltoqsanynan bastap) UEQBJ nysandaryn iske qosýdy jáne KKJ obektilerin – 2025 jylǵy 2 toqsanǵa (2024 jylǵy maýsymnan bastap) aýystyrýdy kózdeıtin jańa jobany bekitý boıynsha suraý salýdy joldady. Joba bıýdjetiniń ulǵaıýy negizinen iske qosylatyn obektilerdiń aýqymdylyǵyna oraı iske qosý-retteý kezeńindegi jumys kóleminiń baǵalanbaýymen baılanysty», - dep naqtylaıdy Energetıka mınıstrliginen.
