Teńiz ken orny tolyq qýatta qashan iske qosylady — mınıstr jaýaby

ASTANA. KAZINFORM — Energetıka mınıstri Almasadam Sátqalıev elimizde munaı óndirý kóleminiń artý sebebin túsindirdi.

— Munaı óndirisi kóleminiń artýy bolashaqta óndiristi keńeıtý jobamyzdyń synaq túrinde iske qosylýymen jáne Teńiz ken ornyndaǵy uńǵyma qysymyn basqarý jobasynyń iske qosylýymen baılanysty. Qazir bul baǵyttaǵy jumys jalǵasýda jáne ken orny tolyq qýatta iske qosý ázirge josparda joq. Josparǵa sáıkes, tolyq qýatta ekinshi jartyjyldyqta iske qosý kútiledi. Bul bizge táýekeldi basqarýǵa belgili bir múmkindik beredi. Sonymen qatar halyqaralyq konsortsıýmdardyń qatysýshylary men aktsıonerlerimen keńes ótkizdik jáne talqylaýdy kelesi aptada ExxonMobil, Total, Shell basqa da iri kompanııalardyń basshylarymen jalǵastyrýdy josparlap otyrmyz, — dedi Almasadam Sátqalıev vedomstvoda ótken baspasóz máslıhatynda.

Mınıstrdiń málimdeýinshe, Qazaqstan keńes aldyna munaı óndirý kólemin tómendetý mindetin qoıyp otyr, ol belgilengen parametrlerge qol jetkizý úshin qajet.

— Dıalog óte nátıjeli ótti, bas tartý týraly jaýap alǵan joqpyz, kerisinshe, Qazaqstan Respýblıkasy Úkimeti qoıǵan mindetterdi oryndaý múmkindikterin konstrýktıvti túrde talqyladyq, — deıdi vedomstvo basshysy.

Buǵan deıin habarlaǵanymyzdaı Qazaqstan OPEK+ kelisimi sheńberinde munaı óndirisin qysqartady. 

Eske sala ketsek, byltyr jyl sońynda OPEK+ elderi munaı óndirýdi 2026 jylǵa deıin qysqartýǵa kelisken edi. 

Bıyl aqpanda belgili bolǵandaı, OPEK+ elderi sáýirden munaı óndirý kólemin arttyrýǵa ýaǵdalasty.

Birer kún buryn belgili bolǵandaı Qazaqstan OPEK+ kelisimi sheńberinde óz mindettemelerine adaldyǵyn rastady.