Teńiz, Qarashyǵanaq, Qashaǵan kenishteri Reseıdiń buǵattaǵy rezervine satyla ma – mınıstrlik jaýaby
ASTANA. KAZINFORM – Energetıka mınıstrligi Kazinform saýalyna bergen jaýabynda «Parasat» kásipkerler alıansynyń Prezıdent janyndaǵy munaı-gaz keńesine joldaǵan usynysy týraly ustanymyn málim etti.
«Parasat» kásipkerler alıansynyń úılestirý keńesi Prezıdent janyndaǵy munaı-gaz keńesine Reseı úkimeti, reseılik munaı kompanııalary, Qazaqstannyń ókiletti munaı kompanııasy jáne Teńiz, Qarashyǵanaq, Qashaǵan kenishterin ıgerip jatqan shetel kásiporyndarynyń arasynda Reseı Federatsııasynyń altyn-valıýta rezervi esebinen úlesterdi satyp alý týraly úshjaqty mámle nusqasyn qarastyrýdy usyndy.
Munaı ken oryndarynyń mámlesi týraly aıtsaq, búgingi tańda iri úsh ken ornyn «Qarashyǵanaq Petrolıým Opereıtıng B.V.» jáne «Nort Kaspıan Opereıtıng Kompanı N.V.» operatorlary ónimdi bólisý týraly kelisim aıasynda, al «Teńizshevroıl» kompanııasy joba jónindegi kelisim negizinde ıgerip jatqanyn atap ótemiz.
Joǵaryda aıtylǵan kelisimderde merdigerdiń munaı-gaz operatsııalaryn júrgizýge aıryqsha quqyǵyna kepildik beretin belgili bir merzim kózdelgen», - dep jazylǵan jaýapta.
Jaýapta Qazaqstan Úkimetiniń sheteldik ınvestorlarǵa mundaı kelisimderde kórsetilgen erejelerdiń turaqtylyǵyna kepildik berip, oryndalýyna mindetteme alǵanyn eske salady.
«Jer qoınaýyn ıgerý týraly kelisimderdegi sharttardyń turaqtylyǵyn saqtaý týraly respýblıkalyq kepildikti saqtaý Qazaqstandaǵy ınvestıtsııalyq klımatqa oń áser etip, eldiń shıkizat salasyna aıtarlyqtaı shetel ınvestıtsııasyn tartýǵa múmkindik berdi.
Sheteldik kompanııalardyń kelisimdegi úlesterin satyp alý máselesine kelsek, Qazaqstan Respýblıkasynyń zańnamasy jáne kelisim sharttary boıynsha, oǵan qatysýshylardyń árqaısysynda óz úlesin qalaı basqaryp, paıdalanatyny týraly aıryqsha quqyq bar ekenin aıtqymyz keledi. Sondaı-aq, osy úlespen baılanysty quqyqtar men mindetteri de bar.
Úkimet kelisimge qatysýshy tarap retinde bul tártipti qurmetteıdi jáne ózge taraptardyń ishki kommertsııalyq sheshimderimen, onyń ishinde úles almasýmen baılanysty kelisimshart qatynasyna kılikpeıdi.
Deı turǵanmen, kelisim aıasyndaǵy úlesterdiń almasýymen baılanysty áreketterdiń bári Qazaqstannyń qoldanystaǵy zańnamasyn, kelisimniń óz talaptaryn tolyq saqtaı otyryp oryndalýy kerek. Sondaı-aq, bul qajetti ruqsattar men maquldaýlardyń belgilengen protsedýralarǵa sáıkes alynatynyn meńzeıdi», - dep jazylǵan mınıstrlik málimetinde.
