Tennısti tastap ketkisi keletin sát barlyǵynda bolady — Elena Rybakına
«Tennısti tastap, bas tartqysy keletin sát barlyǵynda bolady. Mundaı oılar ásirese jeńilisten keıin mazalaıdy. Biraq men fınalǵa shyqqannan keıin óte nátıjeli oıyn boldy. Jalpy meni otbasym únemi qoldaıdy. Sonymen qatar dostarym, komandamnyń qoldaýy bar. Men olarmen kóp ýaqytty birge ótkizemin. Qandaı nátıje bolmasyn árqashan qoldaý bar. Jeńilisten qutylý múmkin emes. Siz únemi jeńe almaısyz, oǵan kónip jumysty jalǵastyrý kerek», - dedi Elena Rybakına elordada tennısten «Bıllı Djın Kıng» kýbogine oraı ótken baspasóz máslıhatynda.
Sondaı-aq, tennısshi jarystardan keıin qalypqa kelý jáne bos ýaqytyn qalaı ótkizetini týraly aıtyp berdi.
«Qalypqa kelý standartty túrde ótedi: jaqsy uıqy jáne durys tamaqtaný. Negizi bos ýaqytym kóp emes, bolǵan jaǵdaıda jaqyndarymmen, dostarymmen ótkizýge tyrysamyn. Sonymen qatar múmkindik bolsa, bir jerge shyǵyp, tamashalaımyn», - deıdi ol.
Aıta keteıik, búgin Memleket basshysy Elena Rybakınany qabyldady.
Kezdesý barysynda tennısshi Prezıdentke Wimbledon-2022 kitabyn syıǵa tartqanyn jazǵan edik.
Elena Rybakına Memleket basshysynyń tennısshige oramal men saǵat syılaǵanyn aıtty.
