Tennısten jasóspirimder quramasy tuńǵysh ret álem chempıonatyna joldama aldy
NUR-SULTAN. QazAqparat - Qazaqstan jasóspirimder quramasy 14 jasqa deıingi tennısshiler arasynda tuńǵysh ret álem chempıonatyna joldama aldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, Úndistannyń Nıý-Delı qalasynda ótken Azııa/Tynyq muhıt aımaǵy irikteý týrnırinde qazaqstandyqtar úshinshi orynǵa ıe boldy.
Qazaqstan jasóspirimder quramasy úshinshi oryn úshin básekede Taılandpen synǵa tústi.
Birinshi unaıdy Damır Jalǵasbaı áperdi. Jas qazaqstandyq tennısshi birinshi partııada 2:6 esebimen ese jiberdi.
Esesine ekinshi sette 1:4 esebimen jeńilip jatyp, tarazy basyn ózine aýdara bildi.
Úshinshi, sheshýshi partııada esep 3:5 bolǵan mezette taılandtyq tennısshiniń eki matchbolyn paıdalanýyna múmkindik bergen joq. Sosyn taǵy bir breık jasap, jeńisti julyp aldy - 7:5.
Budan keıin Zańǵar Nurlanuly qarsylasyn 6:2, 6:1 esebimen tize búktirdi.
Esep 2:0, Qazaqstannyń paıdasynda.
Osylaısha, Qazaqstan jasóspirimder quramasy alǵash ret bıyl kúzde ótetin álem chempıonatynyń fınaldyq kezeńine qatysady.
«Team Kazakhstan» akademııasynyń dırektory Tımýr Aqqazıev 14 jasqa deıingiler arasyndaǵy qurama kapıtany Sergeı Kvaktyń óz shákirtterin tájirıbesimen jeńiske jeteleı bilgendigin atap ótti.
Eske sala keteıik, budan buryn qazaqstandyq tennısshilerdiń Shymkent týrnıriniń fınalyna shyqqanyn jazǵan bolatynbyz.
