Tennısten Prezıdent kýbogy: 19 jastaǵy Islam Orynbasar ekinshi aınalymǵa shyqty

ASTANA. QazAqparat - Qazaqstandyq úsh tennısshi Astanada ótip jatqan Prezıdent kýbogy úshin chellendjer týrnıriniń ekinshi aınalymyna shyqty, dep habarlaıdy QazAqparat tilshisi.

Dmıtrıı Popko Prezıdent kýbogyndaǵy alǵashqy kezdesýin ótkizdi.

Ol túrkııalyq Koraı Kırchıdi 6:4, 4:6, 6:1 esebimen tize búktirdi.

D. Popko shırek fınalǵa shyǵý úshin ózbekstandyq Hýmaıýn Sultanovpen talasady.

Prezıdent kýbogynyń ótken jylǵy fınalısi Denıs Evseev jańazelandııalyq Adjıt Raıdy utty - 6:4, 6:1. Onyń kelesi qarsylasy - Izraıl ókili Orel Kımhı.

Taǵy bir qazaqstandyq, 19 jastaǵy Islam Orynbasar álemniń 616-raketkasy, úndistandyq Prdjval Devti utty - 6:4, 1:6, 6:3. Tennısshiler kortta eki saǵattan astam ýaqyt boıy oınady.

Islam jarystyń 2-raketkasy, jańazelandııalyq Bendjamın Lokpen sheberlik baıqasady.

Eske sala keteıik, budan buryn ıÝlııa Pýtıntsevanyń Gambýrg jarysyn jeńispen bastaǵanyn jazǵan bolatynbyz.

Sondaı-aq, Anna Danılına Germanııadaǵy jarystyń shırek fınalyna shyqty.

Tennısshi Leo Borg Qazaqstanda bári unaǵanyn aıtty.