Tennısten Monpele týrnıri: Býblık 26 eıs jasap, jartylaı fınalǵa shyqty
NUR-SULTAN. QazAqparat – Qazaqstannyń birinshi, álemniń 35-raketkasy Aleksandr Býblık Monpele (Frantsııa) ATP 250 týrnıriniń jartylaı fınalyna shyqty, dep habarlaıdy QazAqparat tilshisi.
Qazaqstandyq tennısshi shırek fınalda álemniń 19-ynshy, osy jarystyń 2-raketkasy, ıspanııalyq Roberto Baýtısta-Agýtpen sheberlik baıqasty.
Birinshi partııada A.Býblık basymdylyq tanytty – 6:4.
Ekinshisinde ıspanııalyq sportshy ese qaıyrdy – 6:2.
Úshinshi, sheshýshi sette match taǵdyry taı-breıkte sheshildi. Onda A.Býblık kezdesýdi eıspen támamdady – 7:6 (7:4).
Qazaqstandyq tennısshi 2 saǵat 4 mınýtqa sozylǵan tartysty báseke barysynda 26 eıs jasap, 9 breık-poınttyń bireýin paıdalandy. Qarsylasy 1 eıs, 2 breıkpen (5 breık-poınt) kózge tústi.
A.Býblık fınalǵa shyǵý úshin reıtıngte ózinen bir saty tómen turǵan serbııalyq Fılıp Kraınovıchpen talasady.
Eske sala keteıik, budan buryn Aleksandr Býblıktiń Monpele týrnıriniń shırek fınalyna shyqqanyn, Devıs kýbogy matchyna qatysatyn Qazaqstan quramasy jarııalanǵanyn jazǵan bolatynbyz.
Sondaı-aq qazaqstandyq tennısshi Mysyrdaǵy týrnırdiń jartylaı fınalyna shyqty.
