Tennısten Maıamı týrnıri: Elena Rybakına tórtinshi aınalymǵa shyǵa almady
NUR-SULTAN. QazAqparat – Qazaqstannyń birinshi, álemniń 23-raketkasy Elena Rybakına Maıamı WTA 1000 týrnıriniń tórtinshi aınalymyna shyǵa almady, dep habarlaıdy QazAqparat tilshisi.
Osy jarystyń 21-raketkasy bolyp tirkelgen E.Rybakına úshinshi aınalymda dúnıejúzilik reıtıngte 58-orynda turǵan ıspanııalyq Sara Sorrıbes-Tormomen kezdesti.
Sorrıbes-Tormo ekinshi aınalymda álemniń 14-raketkasy, amerıkalyq Djenıfer Breıdıdi 3:6, 6:4, 6:1 esebimen utqan bolatyn.
Birinshi partııada oıyn tizginin qolyna alǵan ıspanııalyq tennısshi aıqyn basymdylyq kórsetti – 6:1.
Ekinshi sette de Sorrıbes-Tormo breıkpen alǵa ketti – 2:0. Degenmen Rybakına tarazy basyn teńestirdi – 2:2. Sosyn taǵy bir breık jasap, óz geımin de alyp, esepti 5:3-ke jetkizdi. Qarqyndy údetken ol setti breıkpen túıindedi – 6:3.
Úshinshi, sheshýshi partııany qarsylastar breık almasýmen bastady – 1:1. Sodan keıin ıspanııalyq tennısshi alǵa shyqty – 3:1. Taǵy bir breık – 4:1. Rybakına breık jasaǵanymen, óz geımin berip qoıdy – 2:5. Ispanııalyq sportshy matchqa dop bergende, óz múmkindigin jibergen joq – 6:2.
Tartysty báseke 2 saǵat 28 mınýtqa sozyldy.
S.Sorrıbes-Tormo shırek fınalǵa shyǵý úshin álemniń 4-raketkasy, amerıkalyq Sofııa Kenın nemese reıtıngte 30-satydaǵy Týnıs ókili Ons Jaberdiń bireýimen talasady.
Osylaısha erler men áıelder arasynda ótip jatqan Maıamı masters dodasynda Qazaqstannan Aleksandr Býblık qana qaldy. Ol úshinshi aınalymda aýstralııalyq Djeıms Dakvortpen sheberlik baıqasady.
Eske sala keteıik, budan buryn Aleksandr Býblıktiń Maıamı týrnıriniń úshinshi aınalymyna shyqqanyn jazǵan bolatynbyz.
Al Mıhaıl Kýkýshkın jeńilip qaldy.
