Tennısten Maıamı týrnıri: Dmıtrıı Popko irikteý saıysynyń fınalyna shyqty
NUR-SULTAN. QazAqparat – Qazaqstandyq, álemniń 175-raketkasy Dmıtrıı Popko Maıamı masters týrnırinde irikteý saıysynyń fınalyna shyqty, dep habarlaıdy QazAqparat tilshisi.
Qazaqstandyq tennısshi irikteý saıystarynyń jartylaı fınalynda álemniń 116-raketkasy, brazılııalyq Tıago Monteıromen sheberlik baıqasty.
D.Popko irikteý saıystarynyń 13-raketkasy bolyp tirkelgen qarsylasyn 6:4, 4:6, 6:4 esebimen utty.
Eki saǵat jarymǵa jýyq ýaqytqa sozylǵan match barysynda ol 5 eıs jasap, 10 breık-poınttyń teń jartysyn óz esebine jazdy. T.Monteıro 4 eıs, 4 breıkpen (8 breık-poınt) shekteldi.
Dmıtrıı Popko irikteý saıystarynyń fınalynda álemniń 167-raketkasy, amerıkalyq Djeffrı Djon Volfpen kezdesedi.
Taǵy bir qazaqstandyq Mıhaıl Kýkýshkınniń irikteý saıystarynyń fınalyndaǵy básekelesi – japonııalyq Shıntaro Mochızýkı.
D.Popko men M.Kýkýshkın qarsylastaryn utsa, 23 naýryz – 3 sáýir aralyǵynda ótetin negizgi týrnırge joldama alady.
Maıamı masters týrnırinde Qazaqstannyń birinshi, álemniń 32-raketkasy Aleksandr Býblık te óner kórsetedi.
Eske sala keteıik, budan buryn qazaqstandyq tennısshilerdiń álemdik reıtıngide joǵary kóterilgenin jazǵan bolatynbyz.
Sondaı-aq Mıhaıl Kýkýshkın Maıamı týrnıriniń irikteý saıysyn sátti bastady.
